dard ko kitna chain mila hai parwanon ki mahfil mein

dard ko kitnā chain milā hai parvānoñ kī mahfil meñ

chāragarī dam toḌ ga.ī hai nā-dānoñ kī mahfil meñ

apnoñ kī mahfil meñ dil par tanz ke nashtar barse haiñ

kis darja iḳhlās milā hai begānoñ kī mahfil meñ

aaj vafā par zikr kareñge ahl-e-ḳhirad se dīvāne

aaj junūñ kī sham.a jalegī farzānoñ kī mahfil meñ

ab ke ham bhī vahshat-e-dil ko bahlāne le jā.eñge

ab ke bahāreñ raqs kareñgī vīrānoñ kī mahfil meñ

chāñd kī kirnoñ kī bāhoñ meñ sone vaale jaag uTheñ

halchal mach jaa.e na mere armānoñ kī mahfil meñ

ham saudāgar ashk-e-vafā ke kaun hameñ pahchānegā

kaun haqīqat ko samjhegā afsānoñ kī mahfil meñ

dar-dar ham ne Thokareñ khā.īñ dair-o-haram bhī ghuum aa.e

'rāje' magar insān mile haiñ paimānoñ kī mahfil meñ

dard ko kitna chain mila hai parwanon ki mahfil mein

chaaragari dam toD gai hai na-danon ki mahfil mein

apnon ki mahfil mein dil par tanz ke nashtar barse hain

kis darja iKHlas mila hai beganon ki mahfil mein

aaj wafa par zikr karenge ahl-e-KHirad se diwane

aaj junun ki shama jalegi farzanon ki mahfil mein

ab ke hum bhi wahshat-e-dil ko bahlane le jaenge

ab ke bahaaren raqs karengi viranon ki mahfil mein

chand ki kirnon ki bahon mein sone wale jag uThen

halchal mach jae na mere armanon ki mahfil mein

hum saudagar ashk-e-wafa ke kaun hamein pahchanega

kaun haqiqat ko samjhega afsanon ki mahfil mein

dar-dar hum ne Thokaren khain dair-o-haram bhi ghum aae

'raje' magar insan mile hain paimanon ki mahfil mein