dard-mandon se na puchho ki kidhar baiTh gae

dard-mandoñ se na pūchho ki kidhar baiTh ga.e

terī majlis meñ ġhanīmat hai jidhar baiTh ga.e

hai ġharaz diid se yaañ kaam takalluf se nahīñ

ḳhvāh idhar baiTh ga.e ḳhvāh udhar baiTh ga.e

dekhā hovegā mire ashk kā tūfāñ tum ne

laakh dīvār gire saiñkaḌoñ ghar baiTh ga.e

kis nazar-nāz ne us baaz ko baḳhshī parvāz

saiñkaḌoñ murġh havā phāñd ke par baiTh ga.e

kam hai āvāz tire kūche ke bāshindoñ kī

naala karne se gale un ke magar baiTh ga.e

muft uThne ke nahīñ yaar ke kūche se 'faqīr'

jab ki bistar ko jamā khol kamar baiTh ga.e

dard-mandon se na puchho ki kidhar baiTh gae

teri majlis mein ghanimat hai jidhar baiTh gae

hai gharaz did se yan kaam takalluf se nahin

KHwah idhar baiTh gae KHwah udhar baiTh gae

dekha howega mere ashk ka tufan tum ne

lakh diwar gire sainkaDon ghar baiTh gae

kis nazar-naz ne us baz ko baKHshi parwaz

sainkaDon murgh hawa phand ke par baiTh gae

kam hai aawaz tere kuche ke bashindon ki

nala karne se gale un ke magar baiTh gae

muft uThne ke nahin yar ke kuche se 'faqir'

jab ki bistar ko jama khol kamar baiTh gae