dard mein lab par aah na lana sab ke bas ki baat nahin

dard meñ lab par aah na laanā sab ke bas kī baat nahīñ

hañste hañste ashk chhupānā sab ke bas kī baat nahīñ

ham ne ik zālim ko apnā dil de kar ye jaanā hai

patthar se shīsha Takrānā sab ke bas kī baat nahīñ

shām-e-alam palkoñ par apnī raushan haiñ ashkoñ ke diye

yuuñ chāhat kā jashn manānā sab ke bas kī baat nahīñ

duniyā kī parvāh na kar ke ham ne pyaar kiyā un se

dosh-e-havā pe diip jalānā sab ke bas kī baat nahīñ

gulshan se gul chun ke sajānā apne ghar ko āsāñ hai

sahrā sahrā phuul khilānā sab ke bas kī baat nahīñ

haa.e vo lab ḳhāmosh kisī ke uf vo kisī kī nīchī nazar

kuchh bhī na kah kar sab kah jaanā sab ke bas kī baat nahīñ

jo bhī kahā vo kar ke dikhāyā ham ne mohabbat meñ ai 'mayank'

kahnā aur phir kar ke dikhānā sab ke bas kī baat nahīñ

dard mein lab par aah na lana sab ke bas ki baat nahin

hanste hanste ashk chhupana sab ke bas ki baat nahin

hum ne ek zalim ko apna dil de kar ye jaana hai

patthar se shisha Takrana sab ke bas ki baat nahin

sham-e-alam palkon par apni raushan hain ashkon ke diye

yun chahat ka jashn manana sab ke bas ki baat nahin

duniya ki parwah na kar ke hum ne pyar kiya un se

dosh-e-hawa pe dip jalana sab ke bas ki baat nahin

gulshan se gul chun ke sajaana apne ghar ko aasan hai

sahra sahra phul khilana sab ke bas ki baat nahin

hae wo lab KHamosh kisi ke uf wo kisi ki nichi nazar

kuchh bhi na kah kar sab kah jaana sab ke bas ki baat nahin

jo bhi kaha wo kar ke dikhaya hum ne mohabbat mein ai 'mayank'

kahna aur phir kar ke dikhana sab ke bas ki baat nahin