dard-o-alam ki bhuk badan se nichoD le

dard-o-alam kī bhuuk badan se nichoḌ le

ye jism merā āḳhirī chādar na oḌh le

aa is se qabl ruuh badal Daale āshiyāñ

dil phir kahīñ umiid se rishta na toḌ le

kartā nahīñ maiñ zikr bhī hālāt-e-hāl kā

phir tū nadāmatoñ ke sabab sar na phoḌ le

aisā na ho maiñ chhoḌ ke duniyā tujhe milūñ

aisā na ho ki tū bhī kahīñ muñh hī moḌ le

kah de to maiñ dikhā duuñ tujhe dil ke aable

ghabrā ke phir na tū kahīñ bhauñ.eñ sikoḌ le

'āzād' TuuT jaa.e na sāñsoñ kā silsila

kis ne kahā thā us ko tū sāñsoñ se joḌ le

dard-o-alam ki bhuk badan se nichoD le

ye jism mera aaKHiri chadar na oDh le

aa is se qabl ruh badal Dale aashiyan

dil phir kahin umid se rishta na toD le

karta nahin main zikr bhi haalat-e-haal ka

phir tu nadamaton ke sabab sar na phoD le

aisa na ho main chhoD ke duniya tujhe milun

aisa na ho ki tu bhi kahin munh hi moD le

kah de to main dikha dun tujhe dil ke aable

ghabra ke phir na tu kahin bhaunen sikoD le

'azad' TuT jae na sanson ka silsila

kis ne kaha tha us ko tu sanson se joD le