dard-o-gham aur bhi hain ranj-o-tab aur bhi hain

dard-o-ġham aur bhī haiñ ranj-o-ta.ab aur bhī haiñ

qalb zinda ho to sāmān-e-tarab aur bhī haiñ

bāñkpan in meñ magar zauq-e-junūñ kā sā kahāñ

daftar-e-aql meñ go ziist ke Dhab aur bhī haiñ

terī nazroñ hī pe ilzām nahīñ hai ai dost

kuchh mirī ḳhāna-ḳharābī ke sabab aur bhī haiñ

azmat-e-chāk-e-garebāñ se to inkār nahīñ

vahshat-e-dil ke taqāze magar ab aur bhī haiñ

ġhuncha-o-shīsha-o-sāġhar hī pe mauqūf nahīñ

dil ke naam aur bhī haiñ dil ke laqab aur bhī haiñ

ai ḳham-e-gesū-e-jānāñ meñ ulajhne vaalo

mas.ale dahr meñ tashrīh-talab aur bhī haiñ

dil kā ḳhuuñ honā bhī ik amr-e-ta.ajjub hai magar

ishq meñ aise maqāmāt-e-ajab aur bhī haiñ

sub.h-e-nau un pe bhī kuchh lutf-o-karam ho jaa.e

justujū meñ tirī ġham-dīda-e-shab aur bhī haiñ

mere hī nāloñ pe vo chīñ-ba-jabīñ hote haiñ

varna mahfil meñ ka.ī nāla-ba-lab aur bhī haiñ

'manshā' ik tum hī nahīñ ho ġham-e-hastī ke shikār

kitne arbāb-e-fan-o-ilm-o-adab aur bhī haiñ

dard-o-gham aur bhi hain ranj-o-tab aur bhi hain

qalb zinda ho to saman-e-tarab aur bhi hain

bankpan in mein magar zauq-e-junun ka sa kahan

daftar-e-aql mein go zist ke Dhab aur bhi hain

teri nazron hi pe ilzam nahin hai ai dost

kuchh meri KHana-KHarabi ke sabab aur bhi hain

azmat-e-chaak-e-gareban se to inkar nahin

wahshat-e-dil ke taqaze magar ab aur bhi hain

ghuncha-o-shisha-o-saghar hi pe mauquf nahin

dil ke nam aur bhi hain dil ke laqab aur bhi hain

ai KHam-e-gesu-e-jaanan mein ulajhne walo

masale dahr mein tashrih-talab aur bhi hain

dil ka KHun hona bhi ek amr-e-tajjub hai magar

ishq mein aise maqamat-e-ajab aur bhi hain

subh-e-nau un pe bhi kuchh lutf-o-karam ho jae

justuju mein teri gham-dida-e-shab aur bhi hain

mere hi nalon pe wo chin-ba-jabin hote hain

warna mahfil mein kai nala-ba-lab aur bhi hain

'mansha' ek tum hi nahin ho gham-e-hasti ke shikar

kitne arbab-e-fan-o-ilm-o-adab aur bhi hain