dard-o-gham ka aapko bhi tajraba ho jaega

dard-o-ġham kā aap ko bhī tajraba ho jā.egā

ziist kī jab talḳhiyoñ se sāmnā ho jā.egā

chhoḌ jā parchhā.iyāñ biite hue lamhāt kī

kuchh to jiine kā mujhe bhī aasrā ho jā.egā

chhīn le mujh se mirā ehsās bhī ai zindagī

āḳhirī ehsān mujh pe ye tirā ho jā.egā

khul hī jā.egā bharam ahbāb ke iḳhlās kā

gardish-e-daurāñ meñ jab tū mubtalā ho jā.egā

tū bhī kuchh ilzām de ai dost auroñ kī tarah

kuchh nahīñ to dostī kā haq adā ho jā.egā

toḌ dī ummīd kī baisākhiyāñ hālāt ne

kaun jaane kis ghaḌī kyā hādisa ho jā.egā

naaz thā jis kī vafāoñ par bahut 'sājid' hameñ

kyā ḳhabar thī vo bhī ik din bevafā ho jā.egā

dard-o-gham ka aap ko bhi tajraba ho jaega

zist ki jab talKHiyon se samna ho jaega

chhoD ja parchhaiyan bite hue lamhat ki

kuchh to jine ka mujhe bhi aasra ho jaega

chhin le mujh se mera ehsas bhi ai zindagi

aaKHiri ehsan mujh pe ye tera ho jaega

khul hi jaega bharam ahbab ke iKHlas ka

gardish-e-dauran mein jab tu mubtala ho jaega

tu bhi kuchh ilzam de ai dost auron ki tarah

kuchh nahin to dosti ka haq ada ho jaega

toD di ummid ki baisakhiyan haalat ne

kaun jaane kis ghaDi kya hadisa ho jaega

naz tha jis ki wafaon par bahut 'sajid' hamein

kya KHabar thi wo bhi ek din bewafa ho jaega