dard-o-gham ka bayan nahin malum

dard-o-ġham kā bayāñ nahīñ ma.alūm

pyaar kī dāstāñ nahīñ ma.alūm

raah meñ ham akele baiThe haiñ

kab gayā kārvāñ nahīñ ma.alūm

hashr-sāmāñ haiñ aaj ke hālāt

hoñge kal ham kahāñ nahīñ ma.alūm

ehtirāman haiñ log jaur pe chup

kab khulegī zabāñ nahīñ ma.alūm

dil zamāne se ham lagā baiThe

us kā sūd-o-ziyāñ nahīñ mālūm

hai dhuāñ chimniyoñ kā shahr meñ yā

jal rahe haiñ makāñ nahīñ ma.alūm

dard bāñTeñge kyā vo duniyā ke

jin ko dard-e-nihāñ nahīñ ma.alūm

zaḳhm hī is zamīñ ne baḳhshe haiñ

degā kyā āsmāñ nahīñ ma.alūm

suulī par ham ko jab chaḌhā.eñge

hogā kaisā samāñ nahīñ ma.alūm

aish-o-ishrat ke ḳhūgaro tum ko

soz-e-dard-e-nihāñ nahīñ mālūm

qātil-e-shahr haiñ vahī ye raaz

hogā kyūñkar ayaañ nahīñ ma.alūm

dekhte haiñ vo kahkashāñ har shab

kyā hai ashk-e-ravāñ nahīñ ma.alūm

kis ne poñchhe haiñ ashk mere dost

kaun thā mehrbāñ nahīñ mālūm

ghar se tanhā chale the ham 'shāġhil'

kyuuñ banā kārvāñ nahīñ ma.alūm

dard-o-gham ka bayan nahin malum

pyar ki dastan nahin malum

rah mein hum akele baiThe hain

kab gaya karwan nahin malum

hashr-saman hain aaj ke haalat

honge kal hum kahan nahin malum

ehtiraman hain log jaur pe chup

kab khulegi zaban nahin malum

dil zamane se hum laga baiThe

us ka sud-o-ziyan nahin malum

hai dhuan chimniyon ka shahr mein ya

jal rahe hain makan nahin malum

dard banTenge kya wo duniya ke

jin ko dard-e-nihan nahin malum

zaKHm hi is zamin ne baKHshe hain

dega kya aasman nahin malum

suli par hum ko jab chaDhaenge

hoga kaisa saman nahin malum

aish-o-ishrat ke KHugaro tum ko

soz-e-dard-e-nihan nahin malum

qatil-e-shahr hain wahi ye raaz

hoga kyunkar ayan nahin malum

dekhte hain wo kahkashan har shab

kya hai ashk-e-rawan nahin malum

kis ne ponchhe hain ashk mere dost

kaun tha mehrban nahin malum

ghar se tanha chale the hum 'shaghil'

kyun bana karwan nahin malum