dard se bhaari hua dil kya hua

dard se bhārī huā dil kyā huā

kyā pata rag rag meñ shāmil kyā huā

miT ga.e ham jis ko paane ke liye

zindagī se ham ko hāsil kyā huā

yak-ba-yak sab daaġh dil ke dhul ga.e

maiñ saf-e-qātil meñ shāmil kyā huā

mere qātil kī nigāheñ khul ga.iiñ

maiñ zarā sā ḳhud se ġhāfil kyā huā

har taraf se mujh ko hī nochā gayā

bas kamāne ke maiñ qābil kyā huā

log patthar kī taraf rāġhib hue

aa.ina madd-e-muqābil kyā huā

uTh rahī haiñ us pe 'irfāñ' uñgliyāñ

apne maqsad meñ vo kāmil kyā huā

dard se bhaari hua dil kya hua

kya pata rag rag mein shamil kya hua

miT gae hum jis ko pane ke liye

zindagi se hum ko hasil kya hua

yak-ba-yak sab dagh dil ke dhul gae

main saf-e-qatil mein shamil kya hua

mere qatil ki nigahen khul gain

main zara sa KHud se ghafil kya hua

har taraf se mujh ko hi nocha gaya

bas kamane ke main qabil kya hua

log patthar ki taraf raghib hue

aaina madd-e-muqabil kya hua

uTh rahi hain us pe 'irfan' ungliyan

apne maqsad mein wo kaamil kya hua