dard se yar chiKH uTThe hain

dard se yaar chīḳh uTThe haiñ

sar-e-bāzār chīḳh uTThe haiñ

tū kahānī meñ kyoñ huā shāmil

saare kirdār chīḳh uTThe haiñ

jin ke muñh meñ zabān thī hī nahīñ

vo bhī is baar chīḳh uTThe haiñ

ḳhud hī aa aur aa ke dekh zarā

tere shahkār chīḳh uTThe haiñ

terī tasvīr kyā lagī ghar meñ

dar-o-dīvār chīḳh uTThe haiñ

terā sattār vird karte hue

dil ke sab taar chīḳh uTThe haiñ

aisī āñdhī chalī hai nafrat kī

gul-o-gulzār chīḳh uTThe haiñ

zindagī kā yahī vatīra hai

aap be-kār chīḳh uTThe haiñ

ātish-e-fikr tujh meñ jalte hue

ab chaman-zār chīḳh uTThe haiñ

jin ko nafrat sadā jahāñ se milī

jab milā pyaar chīḳh uTThe haiñ

chup haiñ mazlūm zaḳhm khā kar bhī

tīr-o-talvār chīḳh uTThe haiñ

zabt karte rahe haiñ muddat tak

āḳhir-e-kār chīḳh uTThe haiñ

mere dāman meñ aa.e jab 'tāriq'

phuul aur ḳhaar chīḳh uTThe haiñ

dard se yar chiKH uTThe hain

sar-e-bazar chiKH uTThe hain

tu kahani mein kyon hua shamil

sare kirdar chiKH uTThe hain

jin ke munh mein zaban thi hi nahin

wo bhi is bar chiKH uTThe hain

KHud hi aa aur aa ke dekh zara

tere shahkar chiKH uTThe hain

teri taswir kya lagi ghar mein

dar-o-diwar chiKH uTThe hain

tera sattar wird karte hue

dil ke sab tar chiKH uTThe hain

aisi aandhi chali hai nafrat ki

gul-o-gulzar chiKH uTThe hain

zindagi ka yahi watira hai

aap be-kar chiKH uTThe hain

aatish-e-fikr tujh mein jalte hue

ab chaman-zar chiKH uTThe hain

jin ko nafrat sada jahan se mili

jab mila pyar chiKH uTThe hain

chup hain mazlum zaKHm kha kar bhi

tir-o-talwar chiKH uTThe hain

zabt karte rahe hain muddat tak

aaKHir-e-kar chiKH uTThe hain

mere daman mein aae jab 'tariq'

phul aur KHar chiKH uTThe hain