dard-shanas dil nahin jalwa-talab nazar nahin

dard-shanās dil nahīñ jalva-talab nazar nahīñ

hādsa kitnā saḳht hai un ko abhī ḳhabar nahīñ

aur baḌhegā dard-e-dil raat jo bhiig jā.egī

dekh na vaqt kī taraf vaqt bhī chārāgar nahīñ

kis ko ḳhabar ki ham se kab aap nigāh pher leñ

nashsha to dhuup chhāñv hai baada bhī mo'tabar nahīñ

ham to ḳhizāñ kī dhuup meñ ḳhūn-e-jigar chhiḌak chale

mausam-e-gul kī chāndnī kis ko mile ḳhabar nahīñ

dil ke ta.alluqāt se kaun sā dil ko chain hai

aao kisī se toḌ leñ rishta-e-dil magar nahīñ

ishq pe kaisā dukh paḌā husn pe kyā guzar ga.ī

aaj galī udaas hai aaj vo baam par nahīñ

dil se 'shamīm' guftugū dekhiye kab talak chale

raat bhī muḳhtasar nahīñ baat bhī muḳhtasar nahīñ

dard-shanas dil nahin jalwa-talab nazar nahin

hadsa kitna saKHt hai un ko abhi KHabar nahin

aur baDhega dard-e-dil raat jo bhig jaegi

dekh na waqt ki taraf waqt bhi chaaragar nahin

kis ko KHabar ki hum se kab aap nigah pher len

nashsha to dhup chhanw hai baada bhi mo'tabar nahin

hum to KHizan ki dhup mein KHun-e-jigar chhiDak chale

mausam-e-gul ki chandni kis ko mile KHabar nahin

dil ke talluqat se kaun sa dil ko chain hai

aao kisi se toD len rishta-e-dil magar nahin

ishq pe kaisa dukh paDa husn pe kya guzar gai

aaj gali udas hai aaj wo baam par nahin

dil se 'shamim' guftugu dekhiye kab talak chale

raat bhi muKHtasar nahin baat bhi muKHtasar nahin