dard tera mere dil ko be-mahaba mil gaya

dard terā mere dil ko be-mahābā mil gayā

ya.anī ḳhud qatre se aa kar aaj dariyā mil gayā

tum ne dekhā ik nazar sab kuchh hī goyā mil gayā

dard kā darmāñ milā ġham kā mudāvā mil gayā

aaj kyoñ ā.īna dekhā jā rahā hai baar baar

sach batāo kyā tumheñ koī tumhīñ sā mil gayā

dekh lenā dāstān-e-dard kī rangīniyāñ

āñsuoñ meñ apne ab ḳhūn-e-tamannā mil gayā

saiñkaḌoñ sajde kiye merī jabīn-e-shauq ne

jis jagah par aap kā naqsh-e-kaf-e-pā mil gayā

kaise kaise jauharoñ ko piis Daalā charḳh ne

tere hāthoñ ai ajal miTTī meñ kyā kyā mil gayā

daḳhl shauq-e-dil ko thā merī balā-noshī meñ kuchh

chashm-e-sāqī kī taraf se kuchh ishāra mil gayā

'nāmī'-e-afsurda shauq-e-justujū dil meñ nahīñ

varna fart-e-shauq ne jab us ko DhūñDā mil gayā

dard tera mere dil ko be-mahaba mil gaya

yani KHud qatre se aa kar aaj dariya mil gaya

tum ne dekha ek nazar sab kuchh hi goya mil gaya

dard ka darman mila gham ka mudawa mil gaya

aaj kyon aaina dekha ja raha hai bar bar

sach batao kya tumhein koi tumhin sa mil gaya

dekh lena dastan-e-dard ki ranginiyan

aansuon mein apne ab KHun-e-tamanna mil gaya

sainkaDon sajde kiye meri jabin-e-shauq ne

jis jagah par aap ka naqsh-e-kaf-e-pa mil gaya

kaise kaise jauharon ko pis Dala charKH ne

tere hathon ai ajal miTTi mein kya kya mil gaya

daKHl shauq-e-dil ko tha meri bala-noshi mein kuchh

chashm-e-saqi ki taraf se kuchh ishaara mil gaya

'nami'-e-afsurda shauq-e-justuju dil mein nahin

warna fart-e-shauq ne jab us ko DhunDa mil gaya