daricha hai na koi dar hai kya kiya jae

darīcha hai na koī dar hai kyā kiyā jaa.e

qafas nahīñ hai mirā ghar hai kyā kiyā jaa.e

dhanak ke rang meñ ruḳh par sajā.e rahtī huuñ

shikast-o-reḳht to andar hai kyā kiyā jaa.e

gavāhī degā mire ratjagoñ kī kaun bhalā

bas ek chāñd hī maz.har hai kyā kiyā jaa.e

bhaTak rahā hai jo kashkol-e-nā-murādī liye

samajhtā ḳhud ko sikandar hai kyā kiyā jaa.e

luTā ke dekh chukī huuñ maiñ apnī jaan us par

shikāyatoñ kā vo daftar hai kyā kiyā jaa.e

churānā chāhtī huuñ jis ko lamha do lamha

raqīboñ ko vo mayassar hai kyā kiyā jaa.e

suḳhan se jis ke nahīñ aatī dard kī ḳhushbū

vo kahtā ḳhud ko suḳhanvar hai kyā kiyā jaa.e

daricha hai na koi dar hai kya kiya jae

qafas nahin hai mera ghar hai kya kiya jae

dhanak ke rang mein ruKH par sajae rahti hun

shikast-o-reKHt to andar hai kya kiya jae

gawahi dega mere ratjagon ki kaun bhala

bas ek chand hi mazhar hai kya kiya jae

bhaTak raha hai jo kashkol-e-na-muradi liye

samajhta KHud ko sikandar hai kya kiya jae

luTa ke dekh chuki hun main apni jaan us par

shikayaton ka wo daftar hai kya kiya jae

churana chahti hun jis ko lamha do lamha

raqibon ko wo mayassar hai kya kiya jae

suKHan se jis ke nahin aati dard ki KHushbu

wo kahta KHud ko suKHanwar hai kya kiya jae