dariya-e-ishq jo tha utar kar nahin raha

dariyā-e-ishq jo thā utar kar nahīñ rahā

bātin kā haq-shanās magar mar nahīñ rahā

achchhā to aap ḳhud hī rivāyat ko toḌ deñ

koī agar kisī kā bhalā kar nahīñ rahā

jazbāt is liye nahīñ phūle phale kabhī

dil yād-e-ishq-e-yār kā mehvar nahīñ rahā

shāmil nahīñ hai yaar jo hūrān-e-ḳhuld meñ

gintī meñ merī aaj se sattar nahīñ rahā

aise sitam-shi.ār kā bantā nahīñ hai ġham

jo chhoḌte hue bhī tujhe Dar nahīñ rahā

phir yuuñ huā ki yaar ne dīvār khīñch dī

jo mushtarak thā naḳhl-e-sanobar nahīñ rahā

'e.ajāz' kam nahīñ ye fasurda-dilī kā bhī

ham Dūbne chale to samandar nahīñ rahā

dariya-e-ishq jo tha utar kar nahin raha

baatin ka haq-shanas magar mar nahin raha

achchha to aap KHud hi riwayat ko toD den

koi agar kisi ka bhala kar nahin raha

jazbaat is liye nahin phule phale kabhi

dil yaad-e-ishq-e-yar ka mehwar nahin raha

shamil nahin hai yar jo huran-e-KHuld mein

ginti mein meri aaj se sattar nahin raha

aise sitam-shiar ka banta nahin hai gham

jo chhoDte hue bhi tujhe Dar nahin raha

phir yun hua ki yar ne diwar khinch di

jo mushtarak tha naKHl-e-sanobar nahin raha

'eajaz' kam nahin ye fasurda-dili ka bhi

hum Dubne chale to samandar nahin raha