dariya ke dhaDakte sine tak sahil ki dua le jaunga

dariyā ke dhaḌakte siine tak sāhil kī du'ā le jā.ūñgā

hālāt kī lahroñ par ik din maiñ ḳhud ko bahā le jā.ūñgā

maiñ apne añdhere kamre meñ parchhā.īñ ugāne kī ḳhātir

sūraj kī shu'ā'oñ ko apnī muTThī meñ chhupā le jā.ūñgā

ḳhvāboñ ke dar-o-dīvār pe bhī chehre kī lakīreñ phaileñgī

yādoñ ke mahakte sāyoñ ko āñkhoñ meñ basā le jā.ūñgā

ai bād-e-havādis terī qasam maiñ haar na mānūñgā tujh se

maiñ apnī hathelī meñ rakh kar ik aur diyā le jā.ūñgā

haq-goī agar hai jurm to phir le jaao salīboñ tak mujh ko

suulī ke laTakte phandoñ tak maiñ apnī sadā le jā.ūñgā

kyā soch rahe ho ai logo ab pheñk ke patthar toḌ bhī do

varna maiñ badan ke shīshe ko phir aaj bachā le jā.ūñgā

'ḳhālid' maiñ kisī ke kūche se nākām umīdoñ ko le kar

ik roz badan se lipTā.e zaḳhmoñ kī ridā le jā.ūñgā

dariya ke dhaDakte sine tak sahil ki du'a le jaunga

haalat ki lahron par ek din main KHud ko baha le jaunga

main apne andhere kamre mein parchhain ugane ki KHatir

suraj ki shu'a'on ko apni muTThi mein chhupa le jaunga

KHwabon ke dar-o-diwar pe bhi chehre ki lakiren phailengi

yaadon ke mahakte sayon ko aankhon mein basa le jaunga

ai baad-e-hawadis teri qasam main haar na manunga tujh se

main apni hatheli mein rakh kar ek aur diya le jaunga

haq-goi agar hai jurm to phir le jao salibon tak mujh ko

suli ke laTakte phandon tak main apni sada le jaunga

kya soch rahe ho ai logo ab phenk ke patthar toD bhi do

warna main badan ke shishe ko phir aaj bacha le jaunga

'KHalid' main kisi ke kuche se nakaam umidon ko le kar

ek roz badan se lipTae zaKHmon ki rida le jaunga