dariya nahin sarab hai maine kaha na tha

dariyā nahīñ sarāb hai maiñ ne kahā na thā

duniyā tilism-e-ḳhvāb hai maiñ ne kahā na thā

chhūnā use azaab hai maiñ ne kahā na thā

us kā badan rabāb hai maiñ ne kahā na thā

phir bhī tū us meñ bū-e-vafā DhūñDhtā rahā

vo kāġhazī gulāb hai maiñ ne kahā na thā

jo tere ird-gird havā.eñ haiñ un ke paas

har saañs kā hisāb hai maiñ ne kahā na thā

pachhtā rahā hai dost ko apne bulā ke ghar

vo fitratan ḳharāb hai maiñ ne kahā na thā

vo shah-savār hai jo ḳhushī kī talāsh meñ

ġham us kā ham-rikāb hai maiñ nai kahā na thā

mar.ūb aap kyoñ hue us ke ḳhitāb se

māñgā huā ḳhitāb hai maiñ ne kahā na thā

paḌh kar sañvar sakā na koī aaj tak jise

vo fāltū kitāb hai maiñ ne kahā na thā

kal jis ko dekhne meñ ga.ī raushnī tirī

'ashraf' vo āftāb hai maiñ ne kahā na thā

dariya nahin sarab hai main ne kaha na tha

duniya tilism-e-KHwab hai main ne kaha na tha

chhuna use azab hai main ne kaha na tha

us ka badan rabab hai main ne kaha na tha

phir bhi tu us mein bu-e-wafa DhunDhta raha

wo kaghazi gulab hai main ne kaha na tha

jo tere ird-gird hawaen hain un ke pas

har sans ka hisab hai main ne kaha na tha

pachhta raha hai dost ko apne bula ke ghar

wo fitratan KHarab hai main ne kaha na tha

wo shah-sawar hai jo KHushi ki talash mein

gham us ka ham-rikab hai main nai kaha na tha

marub aap kyon hue us ke KHitab se

manga hua KHitab hai main ne kaha na tha

paDh kar sanwar saka na koi aaj tak jise

wo faltu kitab hai main ne kaha na tha

kal jis ko dekhne mein gai raushni teri

'ashraf' wo aaftab hai main ne kaha na tha