dariya-o-mauj sa kabhi humse juda na ho

dariyā-o-mauj sā kabhī ham se judā na ho

ai but ḳhudā talak bhī tirā āshnā na ho

mahfil meñ is parī kī jo ye dil-jalā na ho

yārab sharāb-e-nāb meñ hī kuchh mazā na ho

us sabz ḳhat ke bose liye maiñ ne ḳhvāb meñ

yārab ġhubār dil meñ kahīñ aa gayā na ho

pilvā rahe ho rū-ba-rū ġhairoñ ko jām-e-mai

aur kahte ho mujhe to mirī jaañ ḳhafā na ho

merī ravish pe kis liye bahkā hai kyā huā

majnūñ se kah do chup bhī ho yuuñ bāvlā na ho

nik.hat se mushk-o-itr kī duniyā mahak ga.ī

paanī nahāne meñ tirā juuḌā khulā na ho

mar hī gayā udhar jo mirā nāma-bar gayā

qāsid ḳhudā ke vāste tū bhī fanā na ho

baḳht-e-siyah zalīl hameñ yuuñ bhī karte haiñ

jis shab vo aa.e ghar ko usī shab diyā na ho

laala ho arġhavāñ ho suḳhan ho gulāb ho

champā ho yāsman ho magar dīliyā na ho

āb-e-ravāñ ho chāñdnī ho sabza-zār ho

nargis kī tarah ġhair koī dekhtā na ho

saaqī ho mai ho gaa.eñ parī-zād sab bahār

sāġhar se jald chalne meñ charḳh-e-dutā na ho

pariyoñ kā raqs rū-ba-rū hotā rahe mudām

pahlū se yaar lab se piyāla judā na ho

sāmān-e-aish gar ye mayassar ho ai 'nasīm'

haT-dharmī hai zabāñ pe jo shukr-e-ḳhudā na ho

dariya-o-mauj sa kabhi hum se juda na ho

ai but KHuda talak bhi tera aashna na ho

mahfil mein is pari ki jo ye dil-jala na ho

yarab sharab-e-nab mein hi kuchh maza na ho

us sabz KHat ke bose liye main ne KHwab mein

yarab ghubar dil mein kahin aa gaya na ho

pilwa rahe ho ru-ba-ru ghairon ko jam-e-mai

aur kahte ho mujhe to meri jaan KHafa na ho

meri rawish pe kis liye bahka hai kya hua

majnun se kah do chup bhi ho yun bawla na ho

nikhat se mushk-o-itr ki duniya mahak gai

pani nahane mein tera juDa khula na ho

mar hi gaya udhar jo mera nama-bar gaya

qasid KHuda ke waste tu bhi fana na ho

baKHt-e-siyah zalil hamein yun bhi karte hain

jis shab wo aae ghar ko usi shab diya na ho

lala ho arghawan ho suKHan ho gulab ho

champa ho yasman ho magar diliya na ho

aab-e-rawan ho chandni ho sabza-zar ho

nargis ki tarah ghair koi dekhta na ho

saqi ho mai ho gaen pari-zad sab bahaar

saghar se jald chalne mein charKH-e-duta na ho

pariyon ka raqs ru-ba-ru hota rahe mudam

pahlu se yar lab se piyala juda na ho

saman-e-aish gar ye mayassar ho ai 'nasim'

haT-dharmi hai zaban pe jo shukr-e-KHuda na ho