dariya sahil tufan dekhe waqt ke aane jaane mein

dariyā sāhil tūfāñ dekhe vaqt ke aane jaane meñ

ham ne saarī umr gañvā dī kashtī paar lagāne meñ

begāne to begāne the begānoñ kā shikva kyā

apnoñ kā bhī haath rahā hai ghar ko aag lagāne meñ

pal do pal meñ Dheh jaate haiñ tāj-mahal armānoñ ke

lekin barsoñ lag jaate haiñ bigḌī baat banāne meñ

hosh-o-ḳhirad kā dāman thāmo josh-o-junūñ se kaam na lo

shīshe par hī ban aatī hai patthar se Takrāne meñ

kaisī manzil kaisī rāheñ ḳhud ko apnā hosh nahīñ

vaqt ne aisā uljhāyā hai apne tāne-bāne meñ

gulshan gulshan sahrā sahrā shabnam-pāshī kī ham ne

phir bhī naam hamārā aayā sho.aloñ ko bhaḌkāne meñ

rang-e-bahārāñ bū-e-gulistāñ un kī kahānī ke unvāñ

zikr ḳhizāoñ kā miltā hai mere hī afsāne meñ

apne hī sar tohmat le lī dīvāne ne dānista

jaane kyā majbūrī hogī sachchī baat batāne meñ

nafrat kī dīvāreñ Dhā deñ pyaar ke āñgan meñ baiTheñ

barbādī hī barbādī hai nāhaq ḳhuun bahāne meñ

dariya sahil tufan dekhe waqt ke aane jaane mein

hum ne sari umr ganwa di kashti par lagane mein

begane to begane the beganon ka shikwa kya

apnon ka bhi hath raha hai ghar ko aag lagane mein

pal do pal mein Dheh jate hain taj-mahal armanon ke

lekin barson lag jate hain bigDi baat banane mein

hosh-o-KHirad ka daman thamo josh-o-junun se kaam na lo

shishe par hi ban aati hai patthar se Takrane mein

kaisi manzil kaisi rahen KHud ko apna hosh nahin

waqt ne aisa uljhaya hai apne tane-bane mein

gulshan gulshan sahra sahra shabnam-pashi ki hum ne

phir bhi nam hamara aaya shoalon ko bhaDkane mein

rang-e-bahaaran bu-e-gulistan un ki kahani ke unwan

zikr KHizaon ka milta hai mere hi afsane mein

apne hi sar tohmat le li diwane ne danista

jaane kya majburi hogi sachchi baat batane mein

nafrat ki diwaren Dha den pyar ke aangan mein baiThen

barbaadi hi barbaadi hai nahaq KHun bahane mein