darogh ke imtihan-kade mein sada yahi karobar hoga

daroġh ke imtihāñ-kade meñ sadā yahī kārobār hogā

jo baḌh ke tā.īd-e-haq karegā vahī sazāvār-e-dār hogā

bilā-ġharaz saada saada bātoñ se Daal deñ rasm dostī kī

jo silsila is tarah chalegā vo lāziman pā.edār hogā

chalo mohabbat kī be-ḳhudī ke hasīn ḳhalvat-kade meñ baiTheñ

ajiib masrūfiyat rahegī na ġhair hogā na yaar hogā

tire gulistāñ kī aabrū hai mahak tirī infirādiyat kī

tū kasmapursī se bujh bhī jaa.e to ġhairat-e-nau-bahār hogā

jahāñ na tū ho na koī hamdard ho na koī sharīf dushman

maiñ sochtā huuñ mujhe vo māhaul kis tarah sāzgār hogā

bahisht meñ bhī janāb-e-zāhid tumheñ na tarjīh mil sakegī

vahāñ bhī ḳhush-zauq āsiyoñ kā tapāk se intizār hogā

'adam' kī shab-ḳheziyoñ ke ahvāl yuuñ sunāte haiñ us ke mahram

ki sunñe vaale ye maan jaa.eñ koī tahajjud-guzār hogā

darogh ke imtihan-kade mein sada yahi karobar hoga

jo baDh ke taid-e-haq karega wahi sazawar-e-dar hoga

bila-gharaz sada sada baaton se Dal den rasm dosti ki

jo silsila is tarah chalega wo laziman paedar hoga

chalo mohabbat ki be-KHudi ke hasin KHalwat-kade mein baiThen

ajib masrufiyat rahegi na ghair hoga na yar hoga

tere gulistan ki aabru hai mahak teri infiradiyat ki

tu kasmapursi se bujh bhi jae to ghairat-e-nau-bahaar hoga

jahan na tu ho na koi hamdard ho na koi sharif dushman

main sochta hun mujhe wo mahaul kis tarah sazgar hoga

bahisht mein bhi janab-e-zahid tumhein na tarjih mil sakegi

wahan bhi KHush-zauq aasiyon ka tapak se intizar hoga

'adam' ki shab-KHeziyon ke ahwal yun sunate hain us ke mahram

ki sunne wale ye man jaen koi tahajjud-guzar hoga