darun-e-zat teri dastaras mein aae baghair

darūn-e-zāt tirī dastaras meñ aa.e baġhair

ham apne aap se nikleñge sar jhukā.e baġhair

'ajīb ḳhvāhish-e-ulfat hai dil-girafta kī

ki 'ishq baḌhtā rahe dard ko baḌhā.e baġhair

'ajīb lams thā kāñdhe pe us ke rakhte hī sar

sisak ke ro paḌe ham hāl-e-dil sunā.e baġhair

ye ehtijāj-e-gulistāñ hai kyoñ ye ḳhushbūeñ

shanāḳht paatī nahīñ gul se duur jaa.e baġhair

jab un se sirf ishāroñ meñ baat hai mumkin

to shart rakh dī hai kiije nazar milā.e baġhair

diloñ ko jānñe vaale dil-e-fasurda kī

kabhī to sun koī fariyād haath uThā.e baġhair

use bhī chain kahāñ mujh se ruuTh jaane par

mujhe sukūn kahāñ us ko bhī manā.e baġhair

darun-e-zat teri dastaras mein aae baghair

hum apne aap se niklenge sar jhukae baghair

'ajib KHwahish-e-ulfat hai dil-girafta ki

ki 'ishq baDhta rahe dard ko baDhae baghair

'ajib lams tha kandhe pe us ke rakhte hi sar

sisak ke ro paDe hum haal-e-dil sunae baghair

ye ehtijaj-e-gulistan hai kyon ye KHushbuen

shanaKHt pati nahin gul se dur jae baghair

jab un se sirf ishaaron mein baat hai mumkin

to shart rakh di hai kije nazar milae baghair

dilon ko jaanne wale dil-e-fasurda ki

kabhi to sun koi fariyaad hath uThae baghair

use bhi chain kahan mujh se ruTh jaane par

mujhe sukun kahan us ko bhi manae baghair