Darun kyunkar baDa hai lutf dariya ki rawani mein

Darūñ kyūñkar baḌā hai lutf dariyā kī ravānī meñ

jinheñ tūfāñ se laḌnā ho vahī rahte haiñ paanī meñ

na hūroñ meñ na ġhilmāñ meñ na hai bāda-e-sāġhar meñ

haqīqī lutf to zāhid hai lamhāt-e-javānī meñ

baḌī hī dilkashī hai māl-o-zar jannat kī bātoñ meñ

taḌap lekin kahāñ hai jo mohabbat kī kahānī meñ

kahāñ fitrat ke nazzāroñ bahāroñ meñ sitāroñ meñ

ki jo taskīn miltī hai mujhe terī nishānī meñ

sadāqat se kahīñ baḌh kar lage hai jhuuT kā rutba

baḌī tāsīr hai vaa.iz tirī jādū-bayānī meñ

tumhāre bāda-e-jannat kī bāteñ sirf bāteñ haiñ

nirālā hai mazā nāseh sharāb-e-arġhavānī meñ

sukūñ hai maut kā qāsid na karnā aarzū us kī

taġhayyur hai asās-e-zindagī duniyā-e-fānī meñ

kabhī sochā hai nādāñ tum to ḳhud hī apnī duniyā ho

zarūrī kyā ki kho jaao jahāñ kī be-karānī meñ

shahīdoñ ke irādoñ se huā mujh par ayaañ āḳhir

hayāt-e-jāvidāñ kā raaz maut-e-nā-gahānī meñ

junūñ hai vasl kā tum ko na samjho pyaar kī bāteñ

mazā kuchh aur 'anvar' gul-ruḳhoñ se khīñchā-tānī meñ

Darun kyunkar baDa hai lutf dariya ki rawani mein

jinhen tufan se laDna ho wahi rahte hain pani mein

na huron mein na ghilman mein na hai baada-e-saghar mein

haqiqi lutf to zahid hai lamhat-e-jawani mein

baDi hi dilkashi hai mal-o-zar jannat ki baaton mein

taDap lekin kahan hai jo mohabbat ki kahani mein

kahan fitrat ke nazzaron bahaaron mein sitaron mein

ki jo taskin milti hai mujhe teri nishani mein

sadaqat se kahin baDh kar lage hai jhuT ka rutba

baDi tasir hai waiz teri jadu-bayani mein

tumhaare baada-e-jannat ki baaten sirf baaten hain

nirala hai maza naseh sharab-e-arghawani mein

sukun hai maut ka qasid na karna aarzu us ki

taghayyur hai asas-e-zindagi duniya-e-fani mein

kabhi socha hai nadan tum to KHud hi apni duniya ho

zaruri kya ki kho jao jahan ki be-karani mein

shahidon ke iradon se hua mujh par ayan aaKHir

hayat-e-jawidan ka raaz maut-e-na-gahani mein

junun hai wasl ka tum ko na samjho pyar ki baaten

maza kuchh aur 'anwar' gul-ruKHon se khincha-tani mein