darun zat ka manzar zamane par nahin khola

darūn zaat kā manzar zamāne par nahīñ kholā

basar ik raat karnī hai abhī bistar nahīñ kholā

musāfir huuñ maiñ bhūkā huuñ sadā.eñ diiñ bahut lekin

darīche khol kar dekhe kisī ne ghar nahīñ kholā

maiñ tujh se māñgtā huuñ is liye maulā niDar ho kar

ki jab māñgā mire a.amāl kā daftar nahīñ kholā

yahāñ par hū kā aalam hai yahāñ aaseb baste haiñ

muqaffal hai ka.ī barsoñ se dil kā dar nahīñ kholā

tamāshā ban gayā āzād ho kar sab kī nazroñ meñ

qafas kholā magar sayyād tū ne par nahīñ kholā

pas-e-dīvār terī yaad meñ ro.e bahut lekin

sar-e-bāzār ham ne yaar apnā sar nahīñ kholā

darun zat ka manzar zamane par nahin khola

basar ek raat karni hai abhi bistar nahin khola

musafir hun main bhuka hun sadaen din bahut lekin

dariche khol kar dekhe kisi ne ghar nahin khola

main tujh se mangta hun is liye maula niDar ho kar

ki jab manga mere aamal ka daftar nahin khola

yahan par hu ka aalam hai yahan aaseb baste hain

muqaffal hai kai barson se dil ka dar nahin khola

tamasha ban gaya aazad ho kar sab ki nazron mein

qafas khola magar sayyaad tu ne par nahin khola

pas-e-diwar teri yaad mein roe bahut lekin

sar-e-bazar hum ne yar apna sar nahin khola