dashna-e-dard har ek sans mein Thahra hoga

dashna-e-dard har ik saañs meñ Thahrā hogā

dil samundar hai to phir ghaav bhī gahrā hogā

terī qurbat meñ mirī saañs ghuTī jaatī hai

maiñ ne sochā thā tirā jism bhī sahrā hogā

mauj-e-ḳhūñ sar se guzar jā.egī jis raat mire

rañg-e-pairāhan-e-shab aur bhī gahrā hogā

chal paḌe haiñ abhī jis par ye safīrān-e-bahār

kisī bajtī huī zanjīr kā lahrā hogā

ḳhushk pattoñ pe chale jaise koī shām-e-ḳhizāñ

ab tirī yaad kā yuuñ jism pe pahrā hogā

kyā ḳhabar thī ye girāñ-goshī kā baa.is hogī

shahr kā shahr sadā par mirī bahrā hogā

hijr kī aag meñ baḌhtī hai 'musavvir' tab-o-tāb

zahr-e-tanhā.ī se rañg aur sunahrā hogā

dashna-e-dard har ek sans mein Thahra hoga

dil samundar hai to phir ghaw bhi gahra hoga

teri qurbat mein meri sans ghuTi jati hai

main ne socha tha tera jism bhi sahra hoga

mauj-e-KHun sar se guzar jaegi jis raat mere

rang-e-pairahan-e-shab aur bhi gahra hoga

chal paDe hain abhi jis par ye safiran-e-bahaar

kisi bajti hui zanjir ka lahra hoga

KHushk patton pe chale jaise koi sham-e-KHizan

ab teri yaad ka yun jism pe pahra hoga

kya KHabar thi ye giran-goshi ka bais hogi

shahr ka shahr sada par meri bahra hoga

hijr ki aag mein baDhti hai 'musawwir' tab-o-tab

zahr-e-tanhai se rang aur sunahra hoga