dasht-dar-dasht phira karta hun pyasa hun main

dasht-dar-dasht phirā kartā huuñ pyāsā huuñ maiñ

aur duniyā ye samajhtī hai ki dariyā huuñ maiñ

tañg sahrā nazar aayā hai jo phailā huuñ maiñ

ho ga.ī hai mirī tasvīr jo simTā huuñ maiñ

justujū jis kī safīnoñ ko rahī hai sadiyoñ

dosto mere vo be-nām jazīra huuñ maiñ

kis liye mujh pe hai ye sust-ravī kā ilzām

zindagī dekh le ḳhud terā sarāpā huuñ maiñ

aarzū mere qadam kī thī kabhī rāhoñ ko

aaj lekin dil-e-imkāñ meñ khaTaktā huuñ maiñ

paḌh sako gar to khuleñ tum pe rumūz-e-hastī

vaqt ke haath meñ ik aisā sahīfa huuñ maiñ

anjuman huuñ maiñ kabhī zaat se apnī 'shiblī'

aur mahfil meñ bhī rah kar kabhī tanhā huuñ maiñ

dasht-dar-dasht phira karta hun pyasa hun main

aur duniya ye samajhti hai ki dariya hun main

tang sahra nazar aaya hai jo phaila hun main

ho gai hai meri taswir jo simTa hun main

justuju jis ki safinon ko rahi hai sadiyon

dosto mere wo be-nam jazira hun main

kis liye mujh pe hai ye sust-rawi ka ilzam

zindagi dekh le KHud tera sarapa hun main

aarzu mere qadam ki thi kabhi rahon ko

aaj lekin dil-e-imkan mein khaTakta hun main

paDh sako gar to khulen tum pe rumuz-e-hasti

waqt ke hath mein ek aisa sahifa hun main

anjuman hun main kabhi zat se apni 'shibli'

aur mahfil mein bhi rah kar kabhi tanha hun main