dasht-e-aiman se chale ku-e-butan tak pahunche

dasht-e-aiman se chale kū-e-butāñ tak pahuñche

tere dīvāne rumūz-e-do-jahāñ tak pahuñche

but ke rāñde hue allāh ke Thukrā.e hue

āḳhir-e-kār dar-e-pīr-e-muġhāñ tak pahuñche

ġham ko haiñ aar vo aaheñ ki laboñ tak aa.eñ

dil pe haiñ baar vo shikve ki zabāñ tak pahuñche

marhale aur bhī haiñ jaañ se guzarne ke sivā

ishq meñ ham-nafaso koī kahāñ tak pahuñche

tire jalvoñ kī rasā.ī kā tamāshā dekhā

manzil-e-dil se chale manzil-e-jāñ tak pahuñche

kārvān-e-ġham-e-dil dasht-e-junūñ se guzrā

aaj ham ġhāyat-e-umr-e-guzarāñ tak pahuñche

ishq kā saath diyā sidq-o-yaqīñ tak aa.e

aql se kaam liyā vahm-o-gumāñ tak pahuñche

ahl-e-mansab ne kiyā kor-nigāhoñ ko salām

ahl-e-dil bārgah-e-dīda-varāñ tak pahuñche

jin ko rahnā thā rahe ham-suḳhanoñ ke hamrāh

jin ko jaanā thā ga.e bazm-e-shahāñ tak pahuñche

mil ga.iiñ sab haram-o-dair kī rāheñ aakar

shukr-sad-shukr ki ham shahr-e-muġhāñ tak pahuñche

rah ga.e yaar qatīl-e-ġham-e-daurāñ ho kar

ham se kuchh soḳhta-jāñ kū-e-butāñ tak pahuñche

phir bahār aa.ī ki nāgāh asīrān-e-ġhayūr

ham-rah-e-shāḳh-e-qafas barq-e-tapāñ tak pahuñche

kuchh karo chāragaro dil kī girāñ-jānī kā

shīsha TuuTe to kaf-e-shīsha-garāñ tak pahuñche

tumhīñ sachche ki rahā rang-e-taġhāful yaksāñ

hamīñ jhūTe kī ḳhamoshī se fuġhāñ tak pahuñche

apne ahvāl o maqāmāt se maiñ vāqif huuñ

vo to hālāt haiñ jo ahl-e-jahāñ tak pahuñche

ḳhush-navā.ī kī milī daad ki mere ash'ār

mahvishāñ kaj-kulahāñ ḳhush-nigahāñ tak pahuñche

maiñ ne rasman jo kiyā 'ishq-e-butāñ se inkār

kyā tabassum lab-e-lālīn-e-butāñ tak pahuñche

merī āñkhoñ se gurezāñ haiñ vo jalve ab tak

aks jin ke mire ā.īna-e-jāñ tak pahuñche

dāman-e-yār kī manzil se guzar kar āḳhir

dast-e-ushshāq sar-e-tājvarāñ tak pahuñche

chāñd utrā mire kāshāne meñ 'ābid' kal raat

dekhiye raat kī ye baat kahāñ tak pahuñche

dasht-e-aiman se chale ku-e-butan tak pahunche

tere diwane rumuz-e-do-jahan tak pahunche

but ke rande hue allah ke Thukrae hue

aaKHir-e-kar dar-e-pir-e-mughan tak pahunche

gham ko hain aar wo aahen ki labon tak aaen

dil pe hain bar wo shikwe ki zaban tak pahunche

marhale aur bhi hain jaan se guzarne ke siwa

ishq mein ham-nafaso koi kahan tak pahunche

tere jalwon ki rasai ka tamasha dekha

manzil-e-dil se chale manzil-e-jaan tak pahunche

karwan-e-gham-e-dil dasht-e-junun se guzra

aaj hum ghayat-e-umr-e-guzaran tak pahunche

ishq ka sath diya sidq-o-yaqin tak aae

aql se kaam liya wahm-o-guman tak pahunche

ahl-e-mansab ne kiya kor-nigahon ko salam

ahl-e-dil bargah-e-dida-waran tak pahunche

jin ko rahna tha rahe ham-suKHanon ke hamrah

jin ko jaana tha gae bazm-e-shahan tak pahunche

mil gain sab haram-o-dair ki rahen aakar

shukr-sad-shukr ki hum shahr-e-mughan tak pahunche

rah gae yar qatil-e-gham-e-dauran ho kar

hum se kuchh soKHta-jaan ku-e-butan tak pahunche

phir bahaar aai ki nagah asiran-e-ghayur

ham-rah-e-shaKH-e-qafas barq-e-tapan tak pahunche

kuchh karo chaaragaro dil ki giran-jaani ka

shisha TuTe to kaf-e-shisha-garan tak pahunche

tumhin sachche ki raha rang-e-taghaful yaksan

hamin jhuTe ki KHamoshi se fughan tak pahunche

apne ahwal o maqamat se main waqif hun

wo to haalat hain jo ahl-e-jahan tak pahunche

KHush-nawai ki mili dad ki mere ash'ar

mahwishan kaj-kulahan KHush-nigahan tak pahunche

main ne rasman jo kiya 'ishq-e-butan se inkar

kya tabassum lab-e-lalin-e-butan tak pahunche

meri aankhon se gurezan hain wo jalwe ab tak

aks jin ke mere aaina-e-jaan tak pahunche

daman-e-yar ki manzil se guzar kar aaKHir

dast-e-ushshaq sar-e-tajwaran tak pahunche

chand utra mere kashane mein 'abid' kal raat

dekhiye raat ki ye baat kahan tak pahunche