dasht-e-ghurbat hai to wo kyun hain KHafa humse bahut

dasht-e-ġhurbat hai to vo kyuuñ haiñ ḳhafā ham se bahut

ham dukhī baiThe haiñ lag chal na sabā ham se bahut

kyā hai dāman meñ ba-juz gard-e-mah-o-sāl-e-umīd

kyuuñ ulajhtī hai zamāne kī havā ham se bahut

ab ham iz.hār-e-alam karne lage haiñ sab se

ab uThā.ī nahīñ jaatī hai jafā ham se bahut

kaun mausam hai ki patthar se lahū ristā hai

ḳhūñ-bahā māñge hai ab dil kī sadā ham se bahut

dād-e-shorīda-sarī paa.e jo sar se guzre

duur bhāge hai abas mauj-e-balā ham se bahut

kar to deñ qissa-e-daurāñ meñ tire ġham kā bayāñ

par lahū māñge hai ye fikr-e-rasā ham se bahut

chaḌhte sūraj ke pujārī vahī nikle jo 'shahāb'

karte the tazkira-e-sidq-o-safā ham se bahut

dasht-e-ghurbat hai to wo kyun hain KHafa hum se bahut

hum dukhi baiThe hain lag chal na saba hum se bahut

kya hai daman mein ba-juz gard-e-mah-o-sal-e-umid

kyun ulajhti hai zamane ki hawa hum se bahut

ab hum izhaar-e-alam karne lage hain sab se

ab uThai nahin jati hai jafa hum se bahut

kaun mausam hai ki patthar se lahu rista hai

KHun-baha mange hai ab dil ki sada hum se bahut

dad-e-shorida-sari pae jo sar se guzre

dur bhage hai abas mauj-e-bala hum se bahut

kar to den qissa-e-dauran mein tere gham ka bayan

par lahu mange hai ye fikr-e-rasa hum se bahut

chaDhte suraj ke pujari wahi nikle jo 'shahab'

karte the tazkira-e-sidq-o-safa hum se bahut