dasht-e-ghurbat mein hui wo aabla-pai ki bas

dasht-e-ġhurbat meñ huī vo ābla-pā.ī ki bas

aur phir kāñToñ ne kī aisī masīhā.ī ki bas

rang vo laayā mirā zauq-e-jabīñ-sā.ī ki bas

āstān-e-yār se āḳhir nidā aa.ī ki bas

jān-levā yuuñ huī rātoñ kī tanhā.ī ki bas

dāstān-e-dard-o-ġham vo dil ne dohrā.ī ki bas

allah allah ehtimām-e-jalva-ārā.ī ki bas

dīda-e-mushtāq kī aisī pazīrā.ī ki bas

mujh pe apnoñ kī huiiñ aisī karam-farmā.iyāñ

merī hālat par vo ġhairoñ ko hañsī aa.ī ki bas

kūcha-e-jānāñ kī jānib jab kabhī uTThe qadam

duur tak samjhāne mujh ko zindagī aa.ī ki bas

tazkira tark-e-mohabbat kā kabhī jab aa gayā

nāseh-e-mushfiq ne vo taqrīr farmā.ī ki bas

sehn-e-gulshan meñ kiyā thā zikr zulf-e-yār kā

paañv meñ sumbul ne vo zanjīr pahnā.ī ki bas

vajah kuchh be-mehrī-e-ahl-e-vatan bhī hai zarūr

varna ġhurbat mujh ko kyoñ is darja raas aa.ī ki bas

mai-kashoñ ke haal par fitrat ko jab rahm aa gayā

mai-kade par yak-ba-yak aisī ghaTā chhā.ī ki bas

māñgte the ham ḳhizāñ ke ḳhatm hone kī duā

us ke jaane par chaman meñ vo bahār aa.ī ki bas

jab shab-e-ġham rahm marg-e-nā-gahāñ ko aa gayā

jāgne vāloñ ko 'tal.at' aisī niiñd aa.ī ki bas

dasht-e-ghurbat mein hui wo aabla-pai ki bas

aur phir kanTon ne ki aisi masihai ki bas

rang wo laya mera zauq-e-jabin-sai ki bas

aastan-e-yar se aaKHir nida aai ki bas

jaan-lewa yun hui raaton ki tanhai ki bas

dastan-e-dard-o-gham wo dil ne dohrai ki bas

allah allah ehtimam-e-jalwa-arai ki bas

dida-e-mushtaq ki aisi pazirai ki bas

mujh pe apnon ki huin aisi karam-farmaiyan

meri haalat par wo ghairon ko hansi aai ki bas

kucha-e-jaanan ki jaanib jab kabhi uTThe qadam

dur tak samjhane mujh ko zindagi aai ki bas

tazkira tark-e-mohabbat ka kabhi jab aa gaya

naseh-e-mushfiq ne wo taqrir farmai ki bas

sehn-e-gulshan mein kiya tha zikr zulf-e-yar ka

panw mein sumbul ne wo zanjir pahnai ki bas

wajah kuchh be-mehri-e-ahl-e-watan bhi hai zarur

warna ghurbat mujh ko kyon is darja ras aai ki bas

mai-kashon ke haal par fitrat ko jab rahm aa gaya

mai-kade par yak-ba-yak aisi ghaTa chhai ki bas

mangte the hum KHizan ke KHatm hone ki dua

us ke jaane par chaman mein wo bahaar aai ki bas

jab shab-e-gham rahm marg-e-na-gahan ko aa gaya

jagne walon ko 'talat' aisi nind aai ki bas