dasht-e-hu se to kabhi bagh-e-nawa se guzra

dasht-e-hū se to kabhī bāġh-e-navā se guzrā

roz maiñ ek na.ī āb-o-havā se guzrā

thartharātī thī zamīñ kaañp rahe the aflāk

sāneha ho ke mire dast-e-duā se guzrā

baaġh meñ bād-e-sabā aag lagātī guzrī

sho.ala-e-hijr dil-e-bād-e-sabā se guzrā

uñgliyoñ meñ tirī ābād hai ik shahr-e-hunar

ye gumāñ bhī tire naqsh-e-kaf-e-pā se guzrā

kis liye chāñd sitāroñ ne kiyā merā tavāf

kaun ye aaj mire ġhār-e-hirā se guzrā

merī āñkhoñ meñ sharāroñ ne kiyā aa ke hujūm

jab mirā shauq-e-ziyāñ kaalī ghaTā se guzrā

vo galī thī tirī haañ terī galī thī shāyad

aisā mahsūs huā kū-e-shifā se guzrā

vaqt ne kaaT diye the par-e-parvāz mire

dast-o-pā mārtā saffāk ḳhalā se guzrā

is zamīñ par na koī dar hai na darvāza magar

jo bhī guzrā hai yahāñ se liye kaase guzrā

maiñ hī maiñ ḳhud ko nazar aaya vahāñ par 'yāvar'

jab tajassus mirā kohsār-e-nidā se guzrā

dasht-e-hu se to kabhi bagh-e-nawa se guzra

roz main ek nai aab-o-hawa se guzra

thartharaati thi zamin kanp rahe the aflak

saneha ho ke mere dast-e-dua se guzra

bagh mein baad-e-saba aag lagati guzri

shoala-e-hijr dil-e-baad-e-saba se guzra

ungliyon mein teri aabaad hai ek shahr-e-hunar

ye guman bhi tere naqsh-e-kaf-e-pa se guzra

kis liye chand sitaron ne kiya mera tawaf

kaun ye aaj mere ghaar-e-hira se guzra

meri aankhon mein shararon ne kiya aa ke hujum

jab mera shauq-e-ziyan kali ghaTa se guzra

wo gali thi teri han teri gali thi shayad

aisa mahsus hua ku-e-shifa se guzra

waqt ne kaT diye the par-e-parwaz mere

dast-o-pa marta saffak KHala se guzra

is zamin par na koi dar hai na darwaza magar

jo bhi guzra hai yahan se liye kase guzra

main hi main KHud ko nazar aaya wahan par 'yawar'

jab tajassus mera kohsar-e-nida se guzra