dasht-e-junun mein qais ki tazim ki gai

dasht-e-junūñ meñ qais kī tā'zīm kī ga.ī

har baat ahl-e-'ishq kī taslīm kī ga.ī

dil meñ mohabbateñ to du'ā.eñ haiñ haath par

har daur meñ faqīr kī takrīm kī ga.ī

mehnat ko bhuuk miltī hai daulat ko har ḳhushī

asbāb-e-jāñ kī kaisī ye taqsīm kī ga.ī

kyā kyā hayāt-o-marg ke pesh aa.e marhale

taḳhrīb kī ga.ī kabhī tanzīm kī ga.ī

ġhairoñ ke jārihāna 'azā.im ke bāvajūd

taslīm mere she'r kī iqlīm kī ga.ī

husn-e-vujūd-e-zan ke karishme to dekhiye

kyā ḳhuub rang-o-nūr kī tajsīm kī ga.ī

zindān-e-shab meñ pheñkā gayā āftāb ko

ā.īn-e-sub.h meñ koī tarmīm kī ga.ī

'rāhī' 'azāb-e-āgahī mushkil thā is liye

duniyā meñ justujū-e-zar-o-sīm kī ga.ī

dasht-e-junun mein qais ki ta'zim ki gai

har baat ahl-e-'ishq ki taslim ki gai

dil mein mohabbaten to du'aen hain hath par

har daur mein faqir ki takrim ki gai

mehnat ko bhuk milti hai daulat ko har KHushi

asbab-e-jaan ki kaisi ye taqsim ki gai

kya kya hayat-o-marg ke pesh aae marhale

taKHrib ki gai kabhi tanzim ki gai

ghairon ke jarihana 'azaim ke bawajud

taslim mere she'r ki iqlim ki gai

husn-e-wujud-e-zan ke karishme to dekhiye

kya KHub rang-o-nur ki tajsim ki gai

zindan-e-shab mein phenka gaya aaftab ko

aain-e-subh mein koi tarmim ki gai

'rahi' 'azab-e-agahi mushkil tha is liye

duniya mein justuju-e-zar-o-sim ki gai