dasht ke KHas hawale nazar aate hain mujhe

dasht ke ḳhaas havāle nazar aate haiñ mujhe

paañv meñ ḳhuun ke chhāle nazar aate haiñ mujhe

haif-sad-haif tujhe dekh nahīñ paatā maiñ

shukr-sad-shukr ujāle nazar aate haiñ mujhe

niiñd lagtī hai chamakte hue sūraj kā shikār

ḳhvāb āñkhoñ ke nivāle nazar aate haiñ mujhe

tum unheñ andhā samajhne kī himāqat na karo

ye to sab dekhne vaale nazar aate haiñ mujhe

jab se ghar chhoḌ ki vo chāñd gayā hai merā

chhat to chhat farsh pe jaale nazar aate haiñ mujhe

ye kahīñ shahr-e-tasavvuf to nahīñ duur talak

sab ke kandhoñ pe doshāle nazar aate haiñ mujhe

dekhtā huuñ maiñ na.e Dhañg se duniyā ko 'fidā'

aur manzar bhī nirāle nazar aate haiñ mujhe

dasht ke KHas hawale nazar aate hain mujhe

panw mein KHun ke chhaale nazar aate hain mujhe

haif-sad-haif tujhe dekh nahin pata main

shukr-sad-shukr ujale nazar aate hain mujhe

nind lagti hai chamakte hue suraj ka shikar

KHwab aankhon ke niwale nazar aate hain mujhe

tum unhen andha samajhne ki himaqat na karo

ye to sab dekhne wale nazar aate hain mujhe

jab se ghar chhoD ki wo chand gaya hai mera

chhat to chhat farsh pe jale nazar aate hain mujhe

ye kahin shahr-e-tasawwuf to nahin dur talak

sab ke kandhon pe doshaale nazar aate hain mujhe

dekhta hun main nae Dhang se duniya ko 'fida'

aur manzar bhi nirale nazar aate hain mujhe