dasht mein phul khila rakkha hai

dasht meñ phuul khilā rakkhā hai

ham ne dil dil se milā rakkhā hai

terī ḳhātir tujhe ma.alūm kahāñ

ham ne kis kis ko bhulā rakkhā hai

bas tirā zikr na.ī fikr ke saath

hijr meñ aur to kyā rakkhā hai

kyā ḳhabar aaj hī kar Dāleñ ham

kaam jo kal pe uThā rakkhā hai

is ne rakkhā hai sukūñ nekī meñ

aur gunāhoñ meñ mazā rakkhā hai

ā.īna dekh rahe ho yā phir

ḳhud ko tasvīr banā rakkhā hai

bair us ko hī charāġhoñ se huā

naam jis ne bhī havā rakkhā hai

faqat apnī na rahī fikr 'jamīl'

ham ne terā bhī patā rakkhā hai

dasht mein phul khila rakkha hai

hum ne dil dil se mila rakkha hai

teri KHatir tujhe malum kahan

hum ne kis kis ko bhula rakkha hai

bas tera zikr nai fikr ke sath

hijr mein aur to kya rakkha hai

kya KHabar aaj hi kar Dalen hum

kaam jo kal pe uTha rakkha hai

is ne rakkha hai sukun neki mein

aur gunahon mein maza rakkha hai

aaina dekh rahe ho ya phir

KHud ko taswir bana rakkha hai

bair us ko hi charaghon se hua

nam jis ne bhi hawa rakkha hai

faqat apni na rahi fikr 'jamil'

hum ne tera bhi pata rakkha hai