dasht se patthar uTha kar shahr mein lae ho kyon

dasht se patthar uThā kar shahr meñ laa.e ho kyoñ

ye lahū māñgeñge tum se ḳhud pe itrā.e ho kyoñ

ḳhushk hai dil kā kañval sāñsoñ meñ ġham kī aag hai

jab barasnā hī nahīñ hai bādaloñ chhā.e ho kyoñ

mai ke sāġhar haiñ agar ġham ko miTāne kā ilaaj

ai na.e mausam ke phūlo pī ke murjhā.e ho kyoñ

ab to ḳhāmoshī tumhārī ḳhaar sī chubhne lagī

chup hī rahnā thā batāo phir yahāñ aa.e ho kyoñ

shab kī maarī bastiyoñ ke har dar-o-dīvār par

dhuup to sūraj kī hai tum ḳhud pe itrā.e ho kyoñ

haath meñ hai haath mausam mast-e-gul mahke hue

dekhne par mere phir tum mujh se sharmā.e ho kyoñ

ye haiñ aisī vādiyāñ dariyā bhī haiñ jin ke sarāb

log haiñ pyāse yahāñ 'asrār' tum aa.e ho kyoñ

dasht se patthar uTha kar shahr mein lae ho kyon

ye lahu mangenge tum se KHud pe itrae ho kyon

KHushk hai dil ka kanwal sanson mein gham ki aag hai

jab barasna hi nahin hai baadalon chhae ho kyon

mai ke saghar hain agar gham ko miTane ka ilaj

ai nae mausam ke phulo pi ke murjhae ho kyon

ab to KHamoshi tumhaari KHar si chubhne lagi

chup hi rahna tha batao phir yahan aae ho kyon

shab ki mari bastiyon ke har dar-o-diwar par

dhup to suraj ki hai tum KHud pe itrae ho kyon

hath mein hai hath mausam mast-e-gul mahke hue

dekhne par mere phir tum mujh se sharmae ho kyon

ye hain aisi wadiyan dariya bhi hain jin ke sarab

log hain pyase yahan 'asrar' tum aae ho kyon