dast-kash hon na mai-e-gul ke KHush-asham abhi

dast-kash hoñ na mai-e-gul ke ḳhush-āshām abhī

ki labālab haiñ mah-o-mehr ke do-jām abhī

zehn meñ saaqī hai mai-ḳhāna hai hai jaam abhī

hosh kahtā huuñ ise hosh kā kyā kaam abhī

mujh ko darkār na hai kufr na islām abhī

sīdhe sīdhe hī chale aate haiñ paiġhām abhī

tū bhī baaqī tirī rahmat bhī hai baaqī saaqī

rahne de hai mai-e-isyāñ se baḌā kaam abhī

ḳhāl-o-gesū se hai ye silsila-e-rāz-o-niyāz

daana sad-dāna ho ye daam ho sad-dām abhī

ziist ke ḳhvāb kī ta.abīr abhī baaqī hai

ibtidā dekh chuke hai magar anjām abhī

rah-rav-e-ishq abhī duur hai me.arāj-e-habīb

rashk-e-manzil na huā raah meñ har gaam abhī

zarra-zarra hai ik ātish-kada-e-nūr kalīm

dekh agar tū na ho ātish-zada-e-bām abhī

imtiyāz-e-man-o-tū rāz-e-ḳhafī hai lekin

ḳhāsgāñ ke liye kahtā huuñ sar-e-ām abhī

aks ko zo'm hai be-mislī-e-rang-o-bū kā

turfa ye hai ki muqābil hai vo gulfām abhī

rāz-goī tirī 'aiman' hai gunāh-e-akbar

maañg le afv ki us kā hai karam aam abhī

dast-kash hon na mai-e-gul ke KHush-asham abhi

ki labaalab hain mah-o-mehr ke do-jam abhi

zehn mein saqi hai mai-KHana hai hai jam abhi

hosh kahta hun ise hosh ka kya kaam abhi

mujh ko darkar na hai kufr na islam abhi

sidhe sidhe hi chale aate hain paigham abhi

tu bhi baqi teri rahmat bhi hai baqi saqi

rahne de hai mai-e-isyan se baDa kaam abhi

KHal-o-gesu se hai ye silsila-e-raaz-o-niyaz

dana sad-dana ho ye dam ho sad-dam abhi

zist ke KHwab ki tabir abhi baqi hai

ibtida dekh chuke hai magar anjam abhi

rah-raw-e-ishq abhi dur hai mearaj-e-habib

rashk-e-manzil na hua rah mein har gam abhi

zarra-zarra hai ek aatish-kada-e-nur kalim

dekh agar tu na ho aatish-zada-e-baam abhi

imtiyaz-e-man-o-tu raaz-e-KHafi hai lekin

KHasgan ke liye kahta hun sar-e-am abhi

aks ko zo'm hai be-misli-e-rang-o-bu ka

turfa ye hai ki muqabil hai wo gulfam abhi

raaz-goi teri 'aiman' hai gunah-e-akbar

mang le afw ki us ka hai karam aam abhi