dastak na koi dar pe na mehman ki tawaqqo

dastak na koī dar pe na mehmāñ kī tavaqqo

ab chhūT ga.ī mahfil-e-yārāñ kī tavaqqo

shaam aa.ī ki phir bujhne lage chāñd sitāre

phir maañd huī jashn-e-charāġhāñ kī tavaqqo

har samt bas ab sūkhe shajar haañp rahe haiñ

aise meñ kare kaun bahārāñ kī tavaqqo

siine meñ sajā.e haiñ tire zaḳhm ke buuTe

marham kī tamanna hai na darmāñ kī tavaqqo

hai ab bhī mujhe tere palaT aane kī ummīd

ab tak hai mujhe va.ada-o-paimāñ kī tavaqqo

bas āḳhirī ummīd kī mānind bachī hai

dil ke kisī kone meñ tirī haañ kī tavaqqo

dastak na koi dar pe na mehman ki tawaqqo

ab chhuT gai mahfil-e-yaran ki tawaqqo

sham aai ki phir bujhne lage chand sitare

phir mand hui jashn-e-charaghan ki tawaqqo

har samt bas ab sukhe shajar hanp rahe hain

aise mein kare kaun bahaaran ki tawaqqo

sine mein sajae hain tere zaKHm ke buTe

marham ki tamanna hai na darman ki tawaqqo

hai ab bhi mujhe tere palaT aane ki ummid

ab tak hai mujhe wada-o-paiman ki tawaqqo

bas aaKHiri ummid ki manind bachi hai

dil ke kisi kone mein teri han ki tawaqqo