dastak pe koi bhi na mujhe aan kar mila

dastak pe koī bhī na mujhe aan kar milā

barsoñ ke ba.ad bhī vo mujhe band dar milā

qismat meñ hādsāt kī likkhī huī thī dhuup

raste meñ sāya-dār na koī shajar milā

bachchoñ se chhin gayā maiñ talāsh-e-ma.āsh meñ

chhuTTī ke bāvajūd maiñ un ko na ghar milā

biivī se roz roz ke jhagḌoñ se āḳhirash

logoñ ko us kā rail kī paTrī pe sar milā

hāthoñ meñ ḳhvāhishāt ke kaase liye hue

mujh ko sukūn-e-dil se tahī har bashar milā

ḳhadshāt bhī na sach se mujhe baaz rakh sake

jhūTī gavāhiyoñ kā na mujh ko hunar milā

us kī ināyatoñ se jhukī shāḳh shāḳh ko

'mehdī' tavaqquāt se baḌh kar samar milā

dastak pe koi bhi na mujhe aan kar mila

barson ke baad bhi wo mujhe band dar mila

qismat mein hadsat ki likkhi hui thi dhup

raste mein saya-dar na koi shajar mila

bachchon se chhin gaya main talash-e-maash mein

chhuTTi ke bawajud main un ko na ghar mila

biwi se roz roz ke jhagDon se aaKHirash

logon ko us ka rail ki paTri pe sar mila

hathon mein KHwahishat ke kase liye hue

mujh ko sukun-e-dil se tahi har bashar mila

KHadshat bhi na sach se mujhe baz rakh sake

jhuTi gawahiyon ka na mujh ko hunar mila

us ki inayaton se jhuki shaKH shaKH ko

'mehdi' tawaqquat se baDh kar samar mila