dastaras mein kahkashan jugnu diya kuchh bhi nahin

dastaras meñ kahkashāñ jugnū diyā kuchh bhī nahīñ

shukr hai phir bhī mire maulā gila kuchh bhī nahīñ

kaun hai maqtūl qātil kaun sab ḳhāmosh haiñ

be-hisī hai varna āñkhoñ se chhupā kuchh bhī nahīñ

is dil-e-betāb ko taskīn āḳhir kaun de

is kī qismat meñ tahammul ke sivā kuchh bhī nahīñ

roz-o-shab ke an-ginat aurāq palTe haiñ magar

zindagī kī kyā haqīqat hai patā kuchh bhī nahīñ

terī qudrat meñ hai saare mas.aloñ kā hal nihāñ

tere aage mere maulā mas.ala kuchh bhī nahīñ

kyā ye kam hai ummatī huuñ maiñ tire mahbūb kā

kaise kah duuñ ai ḳhudā mujh ko milā kuchh bhī nahīñ

munsifoñ ke faisle is daur meñ haiñ be-misāl

us ko dete haiñ sazā jis kī ḳhatā kuchh bhī nahīñ

bevafā ko kyā sunātā maiñ vafā kī dāstāñ

maiñ ne us ko āḳhirī ḳhat meñ likhā kuchh bhī nahīñ

maiñ kisī ko kyuuñ sunā.ūñ apnī rūdād-e-hayāt

tū mirā 'maqsūd' tujh se to chhupā kuchh bhī nahīñ

dastaras mein kahkashan jugnu diya kuchh bhi nahin

shukr hai phir bhi mere maula gila kuchh bhi nahin

kaun hai maqtul qatil kaun sab KHamosh hain

be-hisi hai warna aankhon se chhupa kuchh bhi nahin

is dil-e-betab ko taskin aaKHir kaun de

is ki qismat mein tahammul ke siwa kuchh bhi nahin

roz-o-shab ke an-ginat auraq palTe hain magar

zindagi ki kya haqiqat hai pata kuchh bhi nahin

teri qudrat mein hai sare masalon ka hal nihan

tere aage mere maula masala kuchh bhi nahin

kya ye kam hai ummati hun main tere mahbub ka

kaise kah dun ai KHuda mujh ko mila kuchh bhi nahin

munsifon ke faisle is daur mein hain be-misal

us ko dete hain saza jis ki KHata kuchh bhi nahin

bewafa ko kya sunata main wafa ki dastan

main ne us ko aaKHiri KHat mein likha kuchh bhi nahin

main kisi ko kyun sunaun apni rudad-e-hayat

tu mera 'maqsud' tujh se to chhupa kuchh bhi nahin