dastaras mein nahin haalat tujhe kya malum

dastaras meñ nahīñ hālāt tujhe kyā ma.alūm

ab zarūrī hai mulāqāt tujhe kyā ma.alūm

raat ke pichhle pahar nīñd-shikan tanhā.ī

kaise kartī hai savālāt tujhe kyā ma.alūm

tū ba-zid hai ki sar-e-ām parastish ho tirī

maiñ huuñ pāband-e-rivāyāt tujhe kyā ma.alūm

jashn sāvan kā yuuñ baḌh-chaḌh ke manāne vaale

zulm kyā Dhātī hai barsāt tujhe kyā ma.alūm

shāna-e-vaqt pe ab zulf-e-pareshāñ kī tarah

bikhrī rahtī hai mirī zaat tujhe kyā ma.alūm

silsila-vār dahakte haiñ sahar hone tak

sar-e-mizhgāñ mare jazbāt tujhe kyā ma.alūm

saada bāteñ thiiñ 'ḳhayāl' us kī magar un meñ ka.ī

chup the rañgīn ḳhayālāt tujhe kyā ma.alūm

dastaras mein nahin haalat tujhe kya malum

ab zaruri hai mulaqat tujhe kya malum

raat ke pichhle pahar nind-shikan tanhai

kaise karti hai sawalat tujhe kya malum

tu ba-zid hai ki sar-e-am parastish ho teri

main hun paband-e-riwayat tujhe kya malum

jashn sawan ka yun baDh-chaDh ke manane wale

zulm kya Dhati hai barsat tujhe kya malum

shana-e-waqt pe ab zulf-e-pareshan ki tarah

bikhri rahti hai meri zat tujhe kya malum

silsila-war dahakte hain sahar hone tak

sar-e-mizhgan mare jazbaat tujhe kya malum

sada baaten thin 'KHayal' us ki magar un mein kai

chup the rangin KHayalat tujhe kya malum