daur-e-falak jab dohraata hai mausam-e-gul ki raaton ko

daur-e-falak jab dohrātā hai mausam-e-gul kī rātoñ ko

kunj-e-qafas meñ sun lete haiñ bhūlī-bisrī bātoñ ko

reg-e-ravāñ kī narm tahoñ ko chheḌtī hai jab koī havā

suune sahrā chīḳh uThte haiñ aadhī aadhī rātoñ ko

ātish-e-ġham ke sail-e-ravāñ meñ nīndeñ jal kar raakh huiiñ

patthar ban kar dekh rahā huuñ aatī jaatī rātoñ ko

mai-ḳhāne kā afsurda māhaul to yūñhī rahnā hai

ḳhushk laboñ kī ḳhair manāo kuchh na kaho barsātoñ ko

'nāsir' mere muñh kī bāteñ yuuñ to sachche motī haiñ

lekin un kī bāteñ sun kar bhuul ga.e sab bātoñ ko

daur-e-falak jab dohraata hai mausam-e-gul ki raaton ko

kunj-e-qafas mein sun lete hain bhuli-bisri baaton ko

reg-e-rawan ki narm tahon ko chheDti hai jab koi hawa

sune sahra chiKH uThte hain aadhi aadhi raaton ko

aatish-e-gham ke sail-e-rawan mein ninden jal kar rakh huin

patthar ban kar dekh raha hun aati jati raaton ko

mai-KHane ka afsurda mahaul to yunhi rahna hai

KHushk labon ki KHair manao kuchh na kaho barsaton ko

'nasir' mere munh ki baaten yun to sachche moti hain

lekin un ki baaten sun kar bhul gae sab baaton ko