daur-e-hazir mein sahafat ka gala ghonT diya

daur-e-hāzir meñ sahāfat kā galā ghoñT diyā

be-zamīroñ ne sadāqat kā galā ghoñT diyā

ham ne apnā ke mohabbat kā qarīna yaaro

nafrat-o-buġhz-o-adāvat kā galā ghoñT diyā

zindagī tab kahīñ phir chain-o-sukūñ se guzrī

maiñ ne jab apnī zarūrat kā galā ghoñT diyā

mujh ko Dar thā ki baḌhā de na kahīñ ye duurī

lab pe aate hī shikāyat kā galā ghoñT diyā

is tarah phailī kiran ugte hue sūraj kī

kuchh hī pal meñ shab-e-zulmat kā galā ghoñT diyā

ham-safar maañ kī duā.eñ thiiñ safar meñ yaaro

jis ne har ek musībat kā galā ghoñT diyā

tab qarār aaya kahīñ qalb-e-hazīñ ko mere

jab tire qurb ne vahshat kā galā ghoñT diyā

bil-yaqīñ us ko zamāne meñ milegī manzil

jis musāfir ne sa.ūbat kā galā ghoñT diyā

tujh se mil kar jo milī 'sād' ke is dil ko sanam

us masarrat ne aziyyat kā galā ghoñT diyā

daur-e-hazir mein sahafat ka gala ghonT diya

be-zamiron ne sadaqat ka gala ghonT diya

hum ne apna ke mohabbat ka qarina yaro

nafrat-o-bughz-o-adawat ka gala ghonT diya

zindagi tab kahin phir chain-o-sukun se guzri

main ne jab apni zarurat ka gala ghonT diya

mujh ko Dar tha ki baDha de na kahin ye duri

lab pe aate hi shikayat ka gala ghonT diya

is tarah phaili kiran ugte hue suraj ki

kuchh hi pal mein shab-e-zulmat ka gala ghonT diya

ham-safar man ki duaen thin safar mein yaro

jis ne har ek musibat ka gala ghonT diya

tab qarar aaya kahin qalb-e-hazin ko mere

jab tere qurb ne wahshat ka gala ghonT diya

bil-yaqin us ko zamane mein milegi manzil

jis musafir ne saubat ka gala ghonT diya

tujh se mil kar jo mili 'sad' ke is dil ko sanam

us masarrat ne aziyyat ka gala ghonT diya