daur-e-KHizan mein mazhar-e-josh-e-bahaar the

daur-e-ḳhizāñ meñ maz.har-e-josh-e-bahār the

vo haath jin meñ jaib-o-garebāñ ke taar the

dil hī ko e'tibār na aayā maiñ kyā karūñ

va.ade tumhāre lā.eq-e-sad-e'tibār the

un ke baġhair guzre jo un ke ḳhayāl meñ

lamhe vahī to ashk-e-shab-e-intizār the

jazbe javāñ hue jo salīboñ ke darmiyāñ

ehsās-e-zindagī kā hasīñ shāhkār the

ik terī yaad thī ki jo dil meñ basī rahī

kahne ko yuuñ to mere bahut ġham-gusār the

jo hañste hañste pī ga.e har talḳh baat ko

vo rind mai-kade meñ baḌe bā-vaqār the

majbūriyāñ bhī hotī haiñ kuchh zindagī ke saath

kyā ham ḳhushī se apne ġhamoñ ke shikār the

dariyā kī mauj mauj ne kyā kyā kiye sulūk

kuchh vo batā sakeñge jo tūfāñ ke paar the

'shāhid' ye inqilāb-e-zamāna to dekhiye

muflis vo ho ga.e haiñ ki jo tājdār the

daur-e-KHizan mein mazhar-e-josh-e-bahaar the

wo hath jin mein jaib-o-gareban ke tar the

dil hi ko e'tibar na aaya main kya karun

wade tumhaare laeq-e-sad-e'tibar the

un ke baghair guzre jo un ke KHayal mein

lamhe wahi to ashk-e-shab-e-intizar the

jazbe jawan hue jo salibon ke darmiyan

ehsas-e-zindagi ka hasin shahkar the

ek teri yaad thi ki jo dil mein basi rahi

kahne ko yun to mere bahut gham-gusar the

jo hanste hanste pi gae har talKH baat ko

wo rind mai-kade mein baDe ba-waqar the

majburiyan bhi hoti hain kuchh zindagi ke sath

kya hum KHushi se apne ghamon ke shikar the

dariya ki mauj mauj ne kya kya kiye suluk

kuchh wo bata sakenge jo tufan ke par the

'shahid' ye inqilab-e-zamana to dekhiye

muflis wo ho gae hain ki jo tajdar the