daur-e-nau ka jo taqaza hai nazar mein rakhna

daur-e-nau kā jo taqāzā hai nazar meñ rakhnā

gardish-e-vaqt ko bhī apne asar meñ rakhnā

jaane kis moḌ pe ho jā.egī duniyā dushman

har qadam soch ke tum rāh-e-safar meñ rakhnā

ye jo anmol guhar ziist kā sarmāya haiñ

ashk aa.eñ to inheñ dīda-e-tar meñ rakhnā

rāh-e-dushvār meñ kaam aa.egī be-shak ye bhī

baap aur maañ kī duā zād-e-safar meñ rakhnā

mere lab par koī shikva to nahīñ hai lekin

ai ḳhudā mujh ko duāoñ ke asar meñ rakhnā

din meñ tum dekh na pāoge kahīñ bhī jugnū

raat kā husn sadā zehn-o-nazar meñ rakhnā

imtihāñ-gāh ye duniyā hai koī baat nahīñ

zikr-e-ma.abūd ko sāñsoñ ke safar meñ rakhnā

sabr aur zabt-o-tahammul haiñ bahut qīmtī shai

is kā 'maqsūd' thā dāmān-e-bashar meñ rakhnā

daur-e-nau ka jo taqaza hai nazar mein rakhna

gardish-e-waqt ko bhi apne asar mein rakhna

jaane kis moD pe ho jaegi duniya dushman

har qadam soch ke tum rah-e-safar mein rakhna

ye jo anmol guhar zist ka sarmaya hain

ashk aaen to inhen dida-e-tar mein rakhna

rah-e-dushwar mein kaam aaegi be-shak ye bhi

bap aur man ki dua zad-e-safar mein rakhna

mere lab par koi shikwa to nahin hai lekin

ai KHuda mujh ko duaon ke asar mein rakhna

din mein tum dekh na paoge kahin bhi jugnu

raat ka husn sada zehn-o-nazar mein rakhna

imtihan-gah ye duniya hai koi baat nahin

zikr-e-mabud ko sanson ke safar mein rakhna

sabr aur zabt-o-tahammul hain bahut qimti shai

is ka 'maqsud' tha daman-e-bashar mein rakhna