dauran-e-jang himmat-e-mardana chahiye

daurān-e-jang himmat-e-mardāna chāhiye

himmat agar nahīñ hai to mar jaanā chāhiye

ye kyā ki buz-diloñ kī tarah guftugū kareñ

pesh-e-harīf shān-e-harīfāna chāhiye

terā har e'tirāz sar āñkhoñ pe hai magar

andāz-e-e'tirāz sharīfāna chāhiye

zor-e-bayāñ nahīñ na sahī vaqt-e-guftugū

tarz-e-suḳhan ba-rang-e-kalīmāna chāhiye

paanī meñ rahnā hai to na rakkheñ magar se bair

az-rāh-e-maslahat sahī yārāna chāhiye

bujhte hue diloñ ko jo tahrīk de sake

kirdār aisā hausla-mandāna chāhiye

'rahbar' kisī kī ham-safarī ho jahāñ se baar

tum ko usī maqām se lauT aanā chāhiye

dauran-e-jang himmat-e-mardana chahiye

himmat agar nahin hai to mar jaana chahiye

ye kya ki buz-dilon ki tarah guftugu karen

pesh-e-harif shan-e-harifana chahiye

tera har e'tiraaz sar aankhon pe hai magar

andaz-e-e'tiraaz sharifana chahiye

zor-e-bayan nahin na sahi waqt-e-guftugu

tarz-e-suKHan ba-rang-e-kalimana chahiye

pani mein rahna hai to na rakkhen magar se bair

az-rah-e-maslahat sahi yarana chahiye

bujhte hue dilon ko jo tahrik de sake

kirdar aisa hausla-mandana chahiye

'rahbar' kisi ki ham-safari ho jahan se bar

tum ko usi maqam se lauT aana chahiye