dayar-e-be-hunar mein ye hunar becha nahin maine

dayār-e-be-hunar meñ ye hunar bechā nahīñ maiñ ne

maiñ be-ghar to huā huuñ apnā ghar bechā nahīñ maiñ ne

zarūrat to rahī hai mujh ko bhī ashyā-e-duniyā kī

magar ḳhud ko kabhī bhī lamha-bhar bechā nahīñ maiñ ne

mire siine meñ jo paltā rahā hai ek muddat se

kisī sūrat bhī bachpan kā vo Dar bechā nahīñ maiñ ne

usī ko bech Daalā hai ye joban bhī javānī bhī

ye apnī aabrū ko dar-ba-dar bechā nahīñ maiñ ne

jalā huuñ umr-bhar maiñ is tamāzat meñ sar-e-sahrā

kisī sūrat bhī ġhurbat meñ shajar bechā nahīñ maiñ ne

samandar se adāvat to rahī hai aaj tak 'tanhā'

samandar kā koī la.al-o-gohar bechā nahīñ maiñ ne

dayar-e-be-hunar mein ye hunar becha nahin main ne

main be-ghar to hua hun apna ghar becha nahin main ne

zarurat to rahi hai mujh ko bhi ashya-e-duniya ki

magar KHud ko kabhi bhi lamha-bhar becha nahin main ne

mere sine mein jo palta raha hai ek muddat se

kisi surat bhi bachpan ka wo Dar becha nahin main ne

usi ko bech Dala hai ye joban bhi jawani bhi

ye apni aabru ko dar-ba-dar becha nahin main ne

jala hun umr-bhar main is tamazat mein sar-e-sahra

kisi surat bhi ghurbat mein shajar becha nahin main ne

samandar se adawat to rahi hai aaj tak 'tanha'

samandar ka koi lal-o-gohar becha nahin main ne