dayar-e-dard se aaya hua nahin lagta

dayār-e-dard se aayā huā nahīñ lagtā

maiñ ahl-e-dil ko satāyā huā nahīñ lagtā

mirā vajūd jahāñ hai vahāñ shuhūd nahīñ

maiñ aa bhī jā.ūñ to aayā huā nahīñ lagtā

ye baat sach hai usī ne mujhe banāyā hai

magar maiñ kun se banāyā huā nahīñ lagtā

ye be-hijāb falak aur ye be-libās zamīñ

mujhe to kuchh bhī chhupāyā huā nahīñ lagtā

hai bārishoñ meñ milāvaT ki gard āñkhoñ meñ

koī bhī peḌ nahāyā huā nahīñ lagtā

mirī plate meñ ḳhilqat kī bhuuk nāchtī hai

isī liye mujhe khāyā huā nahīñ lagtā

mirī kamar pe ladā hai anaaj bachchoñ kā

vo bojh hai ki uThāyā huā nahīñ lagtā

fasurda chehra shikasta qadam jhukī nazreñ

ġharīb baap kamāyā huā nahīñ lagtā

dharī hai jis pe tasallī kī degchī 'vāsif'

mujhe vo chūlhā jalāyā huā nahīñ lagtā

dayar-e-dard se aaya hua nahin lagta

main ahl-e-dil ko sataya hua nahin lagta

mera wajud jahan hai wahan shuhud nahin

main aa bhi jaun to aaya hua nahin lagta

ye baat sach hai usi ne mujhe banaya hai

magar main kun se banaya hua nahin lagta

ye be-hijab falak aur ye be-libas zamin

mujhe to kuchh bhi chhupaya hua nahin lagta

hai barishon mein milawaT ki gard aankhon mein

koi bhi peD nahaya hua nahin lagta

meri plate mein KHilqat ki bhuk nachti hai

isi liye mujhe khaya hua nahin lagta

meri kamar pe lada hai anaj bachchon ka

wo bojh hai ki uThaya hua nahin lagta

fasurda chehra shikasta qadam jhuki nazren

gharib bap kamaya hua nahin lagta

dhari hai jis pe tasalli ki degchi 'wasif'

mujhe wo chulha jalaya hua nahin lagta