dayar-e-ghair mein apne dayar ki baaten

dayār-e-ġhair meñ apne dayār kī bāteñ

hoñ jaise ahd-e-ḳhizāñ meñ bahār kī bāteñ

jahān-e-ishq meñ ahl-e-dimāġh mat DhūñDeñ

sukūn-e-qalb kī bāteñ qarār kī bāteñ

hazār fitnoñ kā maskan hai sīna-e-ādam

rumūz-e-ahrman-o-kirdgār kī bāteñ

kashākash-e-ġhame-duniyā se jab milegī najāt

kareñge gesū-o-ruḳhsār-e-yār kī bāteñ

mirā dimāġh bhī majbūr dil bhī hai majbūr

maiñ kis zabāñ se karūñ iḳhtiyār kī bāteñ

'qamar' hamīñ se haiñ sher-o-adab ke hangāme

karoge yaad ġharīb-ud-dayār kī bāteñ

dayar-e-ghair mein apne dayar ki baaten

hon jaise ahd-e-KHizan mein bahaar ki baaten

jahan-e-ishq mein ahl-e-dimagh mat DhunDen

sukun-e-qalb ki baaten qarar ki baaten

hazar fitnon ka maskan hai sina-e-adam

rumuz-e-ahrman-o-kirdgar ki baaten

kashakash-e-ghame-duniya se jab milegi najat

karenge gesu-o-ruKHsar-e-yar ki baaten

mera dimagh bhi majbur dil bhi hai majbur

main kis zaban se karun iKHtiyar ki baaten

'qamar' hamin se hain sher-o-adab ke hangame

karoge yaad gharib-ud-dayar ki baaten