dayar-e-ishq mein aashufta-kar hum bhi hain

dayār-e-ishq meñ āshufta-kār ham bhī haiñ

ze-farq-tā-ba-qadam sho.ala-zār ham bhī haiñ

guzar rahe haiñ gulistāñ se bū-e-gul kī tarah

sharīk-e-mauj-e-nasīm-e-bahār ham bhī haiñ

jo sun sako to hamārī bhī arz-e-ġham sun lo

ki ik dukhe hue dil kī pukār ham bhī haiñ

navāzte haiñ nigāh-e-karam se jo sab ko

ye un se koī kahe be-qarār ham bhī haiñ

tire sitam kā hai is vaqt imtihāñ manzūr

idhar bhī dekh tire jāñ-nisār ham bhī haiñ

kabhī kabhī to hameñ fursat-e-masarrat de

tire shikār ġham-e-rozgār ham bhī haiñ

sharīk-e-mahfil-e-vā.iz jo ho ga.e haiñ to kyā

ba-faiz-e-tishna-labī bāda-ḳhvār ham bhī haiñ

dayar-e-ishq mein aashufta-kar hum bhi hain

ze-farq-ta-ba-qadam shoala-zar hum bhi hain

guzar rahe hain gulistan se bu-e-gul ki tarah

sharik-e-mauj-e-nasim-e-bahaar hum bhi hain

jo sun sako to hamari bhi arz-e-gham sun lo

ki ek dukhe hue dil ki pukar hum bhi hain

nawazte hain nigah-e-karam se jo sab ko

ye un se koi kahe be-qarar hum bhi hain

tere sitam ka hai is waqt imtihan manzur

idhar bhi dekh tere jaan-nisar hum bhi hain

kabhi kabhi to hamein fursat-e-masarrat de

tere shikar gham-e-rozgar hum bhi hain

sharik-e-mahfil-e-waiz jo ho gae hain to kya

ba-faiz-e-tishna-labi baada-KHwar hum bhi hain