dayar-e-shauq ke sab manzaron se uncha hai

dayār-e-shauq ke sab manzaroñ se ūñchā hai

ye sang-e-dar tirā saare gharoñ se ūñchā hai

maqām-e-'ijz ko baḳhshī ga.ī hai rif'at-e-ḳhās

jo sar ḳhamīda hai vo ham-saroñ se ūñchā hai

farāz-e-tūr kī ḳhvāhish na kar abhī ai 'ishq

ye āsmān abhī tere paroñ se ūñchā hai

ḳhudā madad ki ye shaitān nafs-e-ammāra

mire uchhāle hue kankaroñ se ūñchā hai

fareb-e-qāmat-e-rahbar na khaao ham-safaro

vo dekho qadd-e-'alam rahbaroñ se ūñchā hai

ye ashk-e-hijr to sailāb ban gayā hai 'zahīr'

jidhar bhī dekhiye paanī saroñ se ūñchā hai

dayar-e-shauq ke sab manzaron se uncha hai

ye sang-e-dar tera sare gharon se uncha hai

maqam-e-'ijz ko baKHshi gai hai rif'at-e-KHas

jo sar KHamida hai wo ham-saron se uncha hai

faraaz-e-tur ki KHwahish na kar abhi ai 'ishq

ye aasman abhi tere paron se uncha hai

KHuda madad ki ye shaitan nafs-e-ammara

mere uchhaale hue kankaron se uncha hai

fareb-e-qamat-e-rahbar na khao ham-safaro

wo dekho qadd-e-'alam rahbaron se uncha hai

ye ashk-e-hijr to sailab ban gaya hai 'zahir'

jidhar bhi dekhiye pani saron se uncha hai