de ke mafhum ko lafzon ke KHazane mere

de ke mafhūm ko lafzoñ ke ḳhazāne mere

log likkheñge mire baad fasāne mere

de gayā giit ke sar kaun na jaane mere

har parinde kī zabāñ par haiñ tarāne mere

shor-e-dariyā nahīñ hai mujh meñ samundar kā sukūt

ye sifat mujh ko atā kī hai ḳhudā ne mere

phir muḳhātib hai mire jism se purvā yaaro

phir na jaag uTTheñ kahīñ dard purāne mere

bojh maiñ sang-e-muravvat kā uThā.ūñ kaise

tere ehsān ne ḳham kar diye shāne mere

shab se pūchho na.e sūraj kī ubhartī kirno

shab ne dekhe haiñ ziyā-bār zamāne mere

kaisī parvāz ki parvāz se pahle ai dost

bāl-o-par kaaT liye dast-e-havā ne mere

sochtā rahtā hai nākām musāfir shab bhar

kahkashāñ aa.egī rastoñ ko sajāne mere

sāhil-e-vaqt se Takrā hī ga.ī āḳhir 'shād'

mashvare mauj-e-taḳhayyul ne na maane mere

de ke mafhum ko lafzon ke KHazane mere

log likkhenge mere baad fasane mere

de gaya git ke sar kaun na jaane mere

har parinde ki zaban par hain tarane mere

shor-e-dariya nahin hai mujh mein samundar ka sukut

ye sifat mujh ko ata ki hai KHuda ne mere

phir muKHatib hai mere jism se purwa yaro

phir na jag uTThen kahin dard purane mere

bojh main sang-e-murawwat ka uThaun kaise

tere ehsan ne KHam kar diye shane mere

shab se puchho nae suraj ki ubharti kirno

shab ne dekhe hain ziya-bar zamane mere

kaisi parwaz ki parwaz se pahle ai dost

baal-o-par kaT liye dast-e-hawa ne mere

sochta rahta hai nakaam musafir shab bhar

kahkashan aaegi raston ko sajaane mere

sahil-e-waqt se Takra hi gai aaKHir 'shad'

mashware mauj-e-taKHayyul ne na mane mere