de raha hai samar udasi ka

de rahā hai samar udāsī kā

mere dil meñ shajar udāsī kā

puure tan ko banā ke miTTī se

dil banāyā magar udāsī kā

mujh se ik baar tū sabab to pūchh

ai mire be-ḳhabar udāsī kā

tū mudāvā na kar sakegā kabhī

ai mire chārāgar udāsī kā

aañkh vīrāñ hai zehn gum-sum hai

aur dil hai nagar udāsī kā

maiñ ne dekhā udaas nazroñ se

mausamoñ par asar udāsī kā

shā.irī be-sabab nahīñ utrī

ye bhī hai ik samar udāsī kā

kaif-āvar thā ibtidā meñ ishq

aur baaqī safar udāsī kā

pahle tum the makīñ magar ab to

dil hai muddat se ghar udāsī kā

kaa.ī jamne lagī hai manzar par

ye huā hai asar udāsī kā

hijr kī shab kā chāñd aisā thā

jaise bū nāma-bar udāsī kā

aañkh se uḌ gayā hai tā.ir-e-naum

ḳhvāb meñ thā guzar udāsī kā

de raha hai samar udasi ka

mere dil mein shajar udasi ka

pure tan ko bana ke miTTi se

dil banaya magar udasi ka

mujh se ek bar tu sabab to puchh

ai mere be-KHabar udasi ka

tu mudawa na kar sakega kabhi

ai mere chaaragar udasi ka

aankh viran hai zehn gum-sum hai

aur dil hai nagar udasi ka

main ne dekha udas nazron se

mausamon par asar udasi ka

shairi be-sabab nahin utri

ye bhi hai ek samar udasi ka

kaif-awar tha ibtida mein ishq

aur baqi safar udasi ka

pahle tum the makin magar ab to

dil hai muddat se ghar udasi ka

kai jamne lagi hai manzar par

ye hua hai asar udasi ka

hijr ki shab ka chand aisa tha

jaise bu nama-bar udasi ka

aankh se uD gaya hai tair-e-naum

KHwab mein tha guzar udasi ka