de uThe hain lau kuchh yun aariz us pari-ru ke

de uThe haiñ lau kuchh yuuñ aariz us parī-rū ke

jal meñ jaise aks-afgan phuul hoñ lab-e-jū ke

yuuñ dhuāñ-dhuāñ sī haiñ mash.aleñ tamaddun kī

le rahe hoñ saañs un meñ jaise aag ke luuke

aañkh se nikalte hī jā milā jo maaTī meñ

kaun poñchhtā aañsū us ġharīb aañsū ke

kaañp kaañp uThtā hai chāñd kā kaleja jab

TūTte haiñ ā.īne chāñdnī kī ḳhushbū ke

ham jo ek jaañ hote hūk-hūk kar rote

dūriyoñ ke vīrāne marhale man-o-tū ke

sair ġhuncha-o-gul se jis qadar huiiñ āñkheñ

ham usī qadar nikle rang-rūp ke bhūke

raat karvaTeñ kyā kyā liiñ tire tasavvur ne

bār-bār baj uThte kaan har-bun-e-mū ke

de uThe hain lau kuchh yun aariz us pari-ru ke

jal mein jaise aks-afgan phul hon lab-e-ju ke

yun dhuan-dhuan si hain mashalen tamaddun ki

le rahe hon sans un mein jaise aag ke luke

aankh se nikalte hi ja mila jo maTi mein

kaun ponchhta aansu us gharib aansu ke

kanp kanp uThta hai chand ka kaleja jab

TuTte hain aaine chandni ki KHushbu ke

hum jo ek jaan hote huk-huk kar rote

duriyon ke virane marhale man-o-tu ke

sair ghuncha-o-gul se jis qadar huin aankhen

hum usi qadar nikle rang-rup ke bhuke

raat karwaTen kya kya lin tere tasawwur ne

bar-bar baj uThte kan har-bun-e-mu ke