dekh in aankhon se kya jal-thal kar rakkha hai

dekh in āñkhoñ se kyā jal-thal kar rakkhā hai

ġham sī aag ko ham ne bādal kar rakkhā hai

jis ne raah ke peḌoñ kī sab shāḳheñ kāTīñ

sab ne usī ke sar par āñchal kar rakkhā hai

koī pahāḌ hai apnī zaat ke andar jis ne

ḳhud ham se bhī ham ko ojhal kar rakkhā hai

patthar le kar saarā shahr hai us ke pīchhe

ik pāgal ne sab ko pāgal kar rakkhā hai

us ne ḳhālī dasht basāne kī koshish meñ

bhare-pure shahroñ ko jañgal kar rakkhā hai

terī hastī ek furāt sahī par tū ne

mere to āñgan ko karbal kar rakkhā hai

tere jalāl ke munkir to chand ek haiñ lekin

tere azaab ne sab ko be-kal kar rakkhā hai

ab 'shahzād' zamāne se kyā lenā-denā

ham ne bāb-e-dard mukammal kar rakkhā hai

dekh in aankhon se kya jal-thal kar rakkha hai

gham si aag ko hum ne baadal kar rakkha hai

jis ne rah ke peDon ki sab shaKHen kaTin

sab ne usi ke sar par aanchal kar rakkha hai

koi pahaD hai apni zat ke andar jis ne

KHud hum se bhi hum ko ojhal kar rakkha hai

patthar le kar sara shahr hai us ke pichhe

ek pagal ne sab ko pagal kar rakkha hai

us ne KHali dasht basane ki koshish mein

bhare-pure shahron ko jangal kar rakkha hai

teri hasti ek furaat sahi par tu ne

mere to aangan ko karbal kar rakkha hai

tere jalal ke munkir to chand ek hain lekin

tere azab ne sab ko be-kal kar rakkha hai

ab 'shahzad' zamane se kya lena-dena

hum ne bab-e-dard mukammal kar rakkha hai